بۇگىن بىرنەشە اقپارات كوزدەرىندە «قازاقتەلەكوم» كومپانياسىن بيۋدجەت اقشاسىنا 600-گە جۋىق بلوگەر ماقتايتىنى تۋرالى جازىلدى، دەپ حابارلايدى “ادىرنا” ۇلتتىق پورتالى.
2023 جىلعى 29 جەلتوقساندا ۇلتتىق وپەراتور QAMALLADIN MEDIA جانە DOSTYK CAPITAL مەديا اگەنتتىكتەرى كىرەتىن كونسورتسيۋممەن 280 ميلليون تەڭگەگە شارت جاساسقان. اتالعان اگەنتتىكتەردىڭ پورتفەلىنە 600-گە جۋىق بلوگەر كىرەدى.
كەلىسىم-شارت بويىنشا، قوعامدىق پىكىر كوشباسشىلارىنا «قازاقتەلەكوم» كومپانياسى تۋرالى اقپاراتتىق سايتتاردا كەمىندە 180 ماقالا جانە Telegram كانالداردا 20 پوست جازۋ جانە جاريالاۋ قاجەت.
سونداي-اق، بلوگەرلەر ءۇش مەديا جوبا دايىنداپ، تاپسىرىس بەرۋشىنىڭ قوعامداعى وڭ بەدەلىن قالىپتاستىرۋ ءۇشىن YouTube جەلىسىندە توپ-مەنەدجەرلەرمەن سۇحبات ۇيىمداستىرۋى كەرەك. ماڭىزدىسى، بلوگەرلەر بۇل PR ەكەنىن ايتپاۋى شارت.
شارت شەڭبەرىندە كومپانيا وكىلدەرى باعدارلامالارعا ساراپشى رەتىندە قاتىساتىن بولادى. ال ولاردىڭ ۇستانىمى كورەرمەنگە ۇلتتىق كومپانيا قىزمەتى جونىندەگى بارىنشا وبەكتيۆتى باعالاۋ رەتىندە ۇسىنىلۋى ءتيىس دەلىنگەن.
Adata سەرۆيسىنىڭ دەرەكتەرى بويىنشا، «QAMALLADIN MEDIA» جشس 2020 جىلدان بەرى 111 981 859 تەڭگە سالىق تولەگەن بولسا، سونىڭ ىشىندە وتكەن 2023 جىلى 88 046 277 تەڭگە سالىق تولەگەن.
ايتا كەتەيىك، بلوگەرلەردەن باسقا، مەديا اگەنتتىكتىڭ 198 اقپاراتتىق پابليكتەرى، 36 Telegram ارناسى بار. بارلىق مەديا اكتيۆتەرىنىڭ جيىنتىق اۋديتورياسى 9 ميلليون ادامعا جەتەدى.
سونداي-اق، ءوزىنىڭ مەديا ماماندارىن: ماركەتولوگتار، تارگەتولوگتار، ۆيدەوگرافتار جانە باسقا مەديا ماماندار دايارلاۋمەن اينالىساتىن «Qamalladin University» جوباسى دا بار. بۇل ونلاين ۋنيۆەرسيتەتتە ءبىر جىلدىق وقۋ قۇنى 1,5 ملن. تەڭگەنى قۇرايدى.
