“قازاقتەلەكوم" اق فيليالى – سەرۆيستىك فابريكاسىنىڭ لاۋازىمدى ادامدارى "وكىلەتتىلىگىن اسىرا پايدالاندى" دەگەن كۇدىكپەن قاماۋعا الىندى. بۇل تۋرالى انتيكور مالىمدەدى، دەپ حابارلايدى “ادىرنا” ۇلتتىق پورتالى.
سىبايلاس جەمقورلىققا قارسى قىزمەت "قازاقتەلەكوم" اق فيليالى – سەرۆيستىك فابريكاسىنىڭ لاۋازىمدى تۇلعالارىنا قاتىستى وكىلەتتىكتەردى تەرىس پايدالانۋ فاكتىسى بويىنشا قىلمىستىق ءىستى تەرگەپ جاتىر.
«مەملەكەت باسشىسىنىڭ تاپسىرماسىن ورىنداۋ ءۇشىن سىبايلاس جەمقورلىققا قارسى ءىس-قيمىل اگەنتتىگى زاڭسىز ساتىپ الىنعان اكتيۆتەردى قايتارۋ بويىنشا تۇراقتى نەگىزدە جۇمىس جۇرگىزۋدە. قابىلدانعان شارالار مەن تەتىكتەر كەشەنى قويىلعان مىندەتتەردى ءتيىمدى ىسكە اسىرۋعا جانە زاڭدىلىقتىڭ بۇزىلۋىنا ۋاقىتىلى دەن قويۋعا مۇمكىندىك بەرەدى. ماسەلەن، سىبايلاس جەمقورلىققا قارسى قىزمەتتىڭ جامبىل وبلىسى بويىنشا دەپارتامەنتى ۇلتتىق كومپانيانىڭ جىلجىمايتىن مۇلىك پورتفەلىن باسقارۋعا جاۋاپتى بولىمشە بولىپ تابىلاتىن "قازاقتەلەكوم" اق فيليالى – سەرۆيستىك فابريكاسىنىڭ لاۋازىمدى تۇلعالارىنا قاتىستى وكىلەتتىكتەردى تەرىس پايدالانۋ فاكتىسى بويىنشا قىلمىستىق ءىستى تەرگەۋدە. فيليالدىڭ باس ديرەكتورى مەن بىرقاتار قىزمەتكەرلەرى مەملەكەت مۇددەسىنە قايشى جانە كاسىپكەر ءۇشىن پايدا تابۋ ماقساتىندا وعان تاراز قالاسىنداعى قوعامنىڭ اكىمشىلىك عيماراتىن كورىنەۋ تومەن باعامەن ساتقان دەپ كۇدىكتەنەدى»، – دەلىنگەن انتيكور حابارلاماسىندا.
سونداي-اق، باسشىلىقتىڭ زاڭسىز ارەكەتتەرىنىڭ ناتيجەسىندە مەملەكەتكە 450 ميلليون تەڭگەگەدەن استام سوماعا ماتەريالدىق زالال كەلتىرىلگەن.
سوتتىڭ سانكتسياسىمەن كۇدىكتىلەر قاماۋعا الىندى. تەرگەۋ جالعاسىپ جاتىر.
