«قازاقتەلەكوم» اق-عا قاتىستى تەرگەۋ باستالدى. بۇل تۋرالى باسەكەلەستىكتى قورعاۋ جانە دامىتۋ اگەنتتىگىنىڭ ءباسپاسوز قىزمەتى مالىمدەدى، دەپ حابارلايدى “ادىرنا”.
«تالداۋ بارىسىندا بايلانىس وپەراتورلارىنىڭ ستاتسيونارلى ينتەرنەت قىزمەتتەرىنە ارنالعان باعالاردىڭ ديناميكاسى دا زەرتتەلدى. «قازاقتەلەكوم» اق-نىڭ ارەكەتتەرىندە مونوپولياعا قارسى جوعارى باعانى بەلگىلەۋ بەلگىلەرى انىقتالدى. مىسالى، بايلانىس وپەراتورى 2024 جىلى ينتەرنەت تاريفتەرى بويىنشا، ونىڭ ىشىندە 100 مبيت/سەك.، 200 مبيت/سەك. جانە 500 مبيت/سەك. جىلدامدىقتار ءۇشىن 20%-عا دەيىن باعانىڭ ءوسۋىن تىركەگەن. وسىعان بايلانىستى قازىرگى ۋاقىتتا وپەراتورعا قاتىستى باسەكەلەستىكتى قورعاۋ زاڭناماسىنىڭ بۇزىلۋىنا قاتىستى تەرگەۋ جۇرگىزىلۋدە»، — دەلىنگەن جۇما كۇنى تاراتىلعان حابارلامادا.
اگەنتتىك اتاپ وتكەندەي، جۇرگىزىلىپ جاتقان جۇمىستار اياسىندا بايلانىس قىزمەتتەرى نارىعىندا بىرقاتار كەدەرگىلەر انىقتالدى، ولاردى جويۋ ءادىل باسەكەلەستىكتى دامىتۋعا ىقپال ەتۋى مۇمكىن.
«ستاتسيونارلى (فيكسيروۆاننوگو) ينتەرنەت قىزمەتتەرىن كورسەتۋ نارىعىنداعى باسەكەلەستىك جاعدايىن جوسپارلى تالداۋ بارىسىندا كوپقاباتتى تۇرعىن ۇيلەردە تۇرعىندار ءۇشىن ينتەرنەت قىزمەتتەرىن ۇسىناتىن ءۇشىنشى تاراپ بايلانىس وپەراتورلارىنىڭ كىرۋىنە كەدەرگى كەلتىرەتىن توسقاۋىل انىقتالدى. سەبەبى، بايلانىس قىزمەتتەرىنىڭ ساپالى بولۋى ازاماتتاردىڭ نەگىزگى قاجەتتىلىكتەرىنىڭ ءبىرى، ال كوپقاباتتى تۇرعىن ۇيلەردە بايلانىس جەلىلەرىن ورنالاستىرۋ باسەكەلەستىك جاعدايدا ەرەكشە ماڭىزعا يە. الايدا، قازىرگى ۋاقىتتا قولدانىستاعى زاڭنامالىق شەكتەۋلەر ءۇشىنشى تاراپ بايلانىس وپەراتورلارىنىڭ قىزمەتىن كوپقاباتتى ۇيلەردە جۇزەگە اسىرۋعا ءاردايىم مۇمكىندىك بەرمەدى»، — دەلىنگەن حابارلامادا.
سونىمەن قاتار، كابەلدىك كاناليزاتسيا جەلىلەرىنە قوسىلۋ ءۇشىن تەحنيكالىق شارتتاردى وپەراتورلاردان الۋ پروتسەسىن قيىنداتاتىن تاعى ءبىر توسقاۋىل انىقتالدى.
«تابيعي مونوپوليا سۋبەكتىسى كابەلدىك كاناليزاتسيا جەلىلەرىنە قوسىلۋعا رۇقسات الۋ تۋرالى سۇراۋ العان كەزدە تەحنيكالىق شارتتاردى اقىلى نەگىزدە بەرەدى. سونىمەن قاتار، تابيعي مونوپوليالار تۋرالى زاڭنامادا اقى الۋ كوزدەلمەگەن. باسەكەلەستىكتى قورعاۋ جانە دامىتۋ اگەنتتىگىنىڭ ۇسىنىستارى نەگىزىندە نورماتيۆتىك اكتىلەردەن راديوجيىلىكتىك سپەكتردى ءبولۋ بويىنشا ساۋدا-ساتتىققا قاتىسۋ ءۇشىن قاتىسۋشىنىڭ تەلەكوممۋنيكاتسيالىق جانە (نەمەسە) ۇيالى بايلانىس ماگيسترالدىق جەلىسى بولۋى قاجەت دەگەن تالاپتار الىنىپ تاستالدى»، — دەپ حابارلادى.
«بايلانىس تۋرالى» قولدانىستاعى زاڭعا ۆيرتۋالدى وپەراتورلاردىڭ قىزمەتىن قۇقىقتىق رەتتەۋ مەن ۇيالى وپەراتورلاردىڭ قۋاتتارىن جالعا الۋ مۇمكىندىگىن قامتاماسىز ەتەتىن وزگەرىستەر ەنگىزىلدى، بۇل نارىقتاعى باسەكەلەستىكتى دامىتۋ الەۋەتىن ارتتىرادى.
«بۇدان باسقا، باسەكەلەستىكتى قورعاۋ جانە دامىتۋ اگەنتتىگى ۇيالى بايلانىس قىزمەتتەرىنىڭ باعاسى ديناميكاسىن تالداپ، مونوپولياعا قارسى جوعارى باعا بەلگىلەۋ بەلگىلەرىن انىقتادى. قازىرگى ۋاقىتتا ۇيالى بايلانىس وپەراتورىنىڭ زاڭنامانى بۇزۋ تۋرالى تەرگەۋ تاعايىنداۋ ماسەلەسى قاراستىرىلۋدا»، — دەپ حابارلادى اگەنتتىك.
