Búgin birneshe aqparat kózderinde «Qazaqtelekom» kompanııasyn bıýdjet aqshasyna 600-ge jýyq bloger maqtaıtyny týraly jazyldy, dep habarlaıdy “Adyrna” ulttyq portaly.
2023 jylǵy 29 jeltoqsanda ulttyq operator QAMALLADIN MEDIA jáne DOSTYK CAPITAL Medıa agenttikteri kiretin konsorıýmmen 280 mıllıon teńgege shart jasasqan. Atalǵan agenttikterdiń portfeline 600-ge jýyq bloger kiredi.
Kelisim-shart boıynsha, qoǵamdyq pikir kóshbasshylaryna «Qazaqtelekom» kompanııasy týraly aqparattyq saıttarda keminde 180 maqala jáne Telegram kanaldarda 20 post jazý jáne jarııalaý qajet.
Sondaı-aq, blogerler úsh medıa joba daıyndap, tapsyrys berýshiniń qoǵamdaǵy oń bedelin qalyptastyrý úshin YouTube jelisinde top-menedjerlermen suhbat uıymdastyrýy kerek. Mańyzdysy, blogerler bul PR ekenin aıtpaýy shart.
Shart sheńberinde kompanııa ókilderi baǵdarlamalarǵa sarapshy retinde qatysatyn bolady. Al olardyń ustanymy kórermenge ulttyq kompanııa qyzmeti jónindegi barynsha obektıvti baǵalaý retinde usynylýy tıis delingen.
Adata servısiniń derekteri boıynsha, «QAMALLADIN MEDIA» JShS 2020 jyldan beri 111 981 859 teńge salyq tólegen bolsa, sonyń ishinde ótken 2023 jyly 88 046 277 teńge salyq tólegen.
Aıta keteıik, blogerlerden basqa, medıa agenttiktiń 198 aqparattyq pablıkteri, 36 Telegram arnasy bar. Barlyq medıa aktıvteriniń jıyntyq aýdıtorııasy 9 mıllıon adamǵa jetedi.
Sondaı-aq, óziniń medıa mamandaryn: marketologtar, targetologtar, vıdeograftar jáne basqa medıa mamandar daıarlaýmen aınalysatyn «Qamalladin University» jobasy da bar. Bul onlaın ýnıversıtette bir jyldyq oqý quny 1,5 mln. teńgeni quraıdy.
