ورالداعى ازىق-تۇلىك دۇكەندەرىنىڭ بىرىنە ۇرلىققا تۇسكەن ەر ادام ساتۋشىعا اياۋسىز شابۋىل جاساعان. بەينەجازبادا كورسەتىلگەندەي ول ايەلدى ۇرىپ-سوعىپ، وقيعا ورنىنان قاشىپ كەتكەن، دەپ حابارلايدى "ادىرنا" ۇلتتىق پورتالى باتىس قازاقستان پوليتسيا دەپارتامەنتىنىڭ Instagram جەلىسىندەگى پاراقشاسىنا سىلتەمە جاساپ.
باتىس قازاقستان پوليتسيا باسقارماسىنىڭ مالىمەتىنشە، ەر ادام كەشكى ۋاقىتتا دۇكەنگە كىرىپ، ءبىراز تاۋاردى الىپ، اقشاسىن تولەۋ ءۇشىن كاسساعا بارعان. سودان كەيىن ساتۋشىدان پاكەت سۇراپ، ول ەڭكەيگەندە باسىنان كىرپىشپەن ۇرعان. ايەل ەدەنگە قۇلاعان، ال شابۋىل جاساعان ەر ادام اقشا تالاپ ەتىپ، ونى ۇرىپ-سوعىپ، شاشىنان سۇيرەۋدى جالعاستىرعان.
قاراقشى كاسسادان 20 مىڭ تەڭگە الىپ، سوڭىنان قاشىپ كەتتى.
وقيعادان سوڭ ساتۋشى پوليتسياعا حابارلاسقان. ناتيجەسىندە، ءتارتىپ ساقشىلارى شابۋىلداۋشىنى قۇرىقتادى.
"قاراقشى بۇرىن بىرنەشە رەت سوتتالعان ورال قالاسىنىڭ تۇرعىنى بولىپ شىقتى. ۇستالعان ازامات ۋاقىتشا ۇستاۋ يزولياتورىنا قامالدى. وعان قاتىستى "قاراقشىلىق" بابى بويىنشا سوتقا دەيىنگى تەرگەۋ امالدارى باستالدى", - دەپ حابارلادى پوليتسەيلەر.
"ادىرنا" ۇلتتىق پورتالى
