9 مامىر كۇنى كەشكە ورال قالاسىنىڭ قالالىق دەمالىس ساياباعىندا بالالار ويناپ جۇرگەن باتۋتتىڭ جەلى شىعىپ كەتتى، دەپ حابارلايدى "ادىرنا" ۇلتتىق پورتالى مويگورود-قا سىلتەمە جاساپ.
ۆيدەو اۆتورىنىڭ ايتۋىنشا، باتۋت ءبىر ساتتە وزىنە ءتان دىبىس شىعارىپ، باتۋتتىڭ قاتتىلىق دەڭگەيى تومەندەي باستاعان.
"باتۋت كىشكەنتاي ەمەس، بيىك جانە كولەمدى. وندا ءار ءتۇرلى جاستاعى 20-عا جۋىق بالا بولعان. اتا-انالار بالالاردى قۇتقارۋ ءۇشىن بىردەن اتتراكتسيونعا جۇگىردى. كوپتەگەن بالالار قورقىپ، جىلاپ جىبەردى. كىرە بەرىستەگى قىز بۇل ونىڭ باتۋتى ەكەنىن ايتتى، بىراق ول ءتىپتى كەشىرىم دە سۇرامادى. ول جاي عانا ەلەكتر قۋاتى وشىرىلگەنىن ايتتى", دەيدى قالا تۇرعىنى سامال.
ونىڭ ايتۋىنشا، بالالار اۋىر جاراقات العان جوق، بىراق ولار قاتتى قورقىپتى. ول سونداي-اق اتتراكتسيوننىڭ يەسى الدىمەن اقشانى قايتارعىسى كەلمەگەنىن، كەيىن عانا قايتارعانىن ايتتى.
"اڭگىمە اقشا تۋرالى ەمەس، وقيعانىڭ ءوزى تۋرالى. ەگەر بالالاردىڭ ءبىرى اۋىر جاراقات السا نەمەسە قۇداي ساقتاسىن، قايتىس بولىپ كەتسە شە؟ سوندا ناعىز قاسىرەت بولار ەدى. نەلىكتەن بۇل اتتراكتسيوندار تەكسەرىلمەيدى؟ نەلىكتەن قوسالقى گەنەراتورلار جوق؟ نەلىكتەن ساياباققا باتۋتتار قويىلعان؟ بۇل دەمالىس ورنى، ولار ءار قادام سايىن وتە المايتىنداي اتتراكتسيونداردى قويىپ تاستاعان. بالاعا ونىڭ قاۋىپتى ەكەنىن قالاي تۇسىندىرۋگە بولادى؟ جاقىندا كارۋسەلگە قاتىستى ءىس تە بولدى", دەيدى ايەل.
بۇل ارادا قالالىق مادەنيەت جانە دەمالىس ساياباعىنىڭ ديرەكتورى جاسۇلان ساكەنوۆ بولعان جايتتان حابارسىز ەكەنىن، بىراق تەكسەرىس جۇرگىزەتىنىن ايتتى.
"كەشە مەرەكە بولدى، مەن كەشكە دەيىن جۇمىستا بولدىم، بىراق ماعان بۇل جاعداي تۋرالى ايتىلمادى. ەلەكتر قۋاتى كەشە شىنىمەن ءسونىپ قالدى، سوعان بايلانىستى شىعار. بۇگىن ءبىز قىزمەتتىك تەرگەۋ جۇرگىزەمىز", دەپ اتاپ ءوتتى جاسۇلان ساكەنوۆ.
"ادىرنا" ۇلتتىق پورتالى
(فوتو اشىق دەرەككوزدەن)
