Оралдағы азық-түлік дүкендерінің біріне ұрлыққа түскен ер адам сатушыға аяусыз шабуыл жасаған. Бейнежазбада көрсетілгендей ол әйелді ұрып-соғып, оқиға орнынан қашып кеткен, деп хабарлайды "Адырна" ұлттық порталы Батыс Қазақстан полиция департаментінің Instagram желісіндегі парақшасына сілтеме жасап.
Батыс Қазақстан полиция басқармасының мәліметінше, ер адам кешкі уақытта дүкенге кіріп, біраз тауарды алып, ақшасын төлеу үшін кассаға барған. Содан кейін сатушыдан пакет сұрап, ол еңкейгенде басынан кірпішпен ұрған. Әйел еденге құлаған, ал шабуыл жасаған ер адам ақша талап етіп, оны ұрып-соғып, шашынан сүйреуді жалғастырған.
Қарақшы кассадан 20 мың теңге алып, соңынан қашып кетті.
Оқиғадан соң сатушы полицияға хабарласқан. Нәтижесінде, тәртіп сақшылары шабуылдаушыны құрықтады.
"Қарақшы бұрын бірнеше рет сотталған Орал қаласының тұрғыны болып шықты. Ұсталған азамат уақытша ұстау изоляторына қамалды. Оған қатысты "Қарақшылық" бабы бойынша сотқа дейінгі тергеу амалдары басталды", - деп хабарлады полицейлер.
"Адырна" ұлттық порталы
