«بالاپان باسىنا، تۇرىمتاي تۇسىنا» جاعداي ورىن العان «ەسكى قازاقستاننىڭ» ەلباسيزم كەزىندەگى بيلىك جۇيەسى قازاق قوعامىنا «الا قويدى بولە قىرقۋ» ءپرينتسيپىن ومىرگە اكەلىپ، شىرىلداعان شىندىق ءۇشىن كۇرەسكەندەردىڭ «ءبىر ەلى اۋزىنا ءتورت ەلى قاقپاق» قويعىزعانى جاسىرىن ەمەس.
ەندى ەل سايلاعان مەملەكەت باسشىسى وسى ەسكى جۇيە ورنىقتىرعان ءتارتىپ پەن باسسىزدىقتىڭ ءتۇپ تامىرىنا بالتا شابۋ ءۇشىن ءبىرسىپىرا جۇمىستار اتقارىپ جاتىر. بۇرىن ءۇنى شىقپايتىن جۇرت ەندى كوڭىلدەگى تۇيتكىلدەرىن پرەزيدەنتكە اشىق جەتكىزە الاتىن بولدى.
جۋىردا Abai.kz رەداكتسياسىنا: «ۇلىم تەرەڭ قالتالى ءداۋ-دوكەيلەردىڭ «جاپتىم – جالا، جاقتىم كۇيە» ارەكەتىنىڭ كەسىرىنەن جازىقسىز سوتتالىپ كەتتى»، - دەپ شىپ-پىر بولعان اتا-انا كەلدى. پرەزيدەنت توقاەۆتىڭ اتىنا اراشا سۇراپ جازعان ءۇشبۋ حاتتارىن كوتەرى كەلىپتى.
اشيرحان سەيدازوۆ پەن كاميلانىڭ نۋرماحانوۆا بالاسى ەرنار سەيدازوۆقا الماتى قالاسى الاتاۋ اۋداندىق سوتى مەن الماتى قالاسى قىلمىستىق ىستەر جونىندەگى القاسى «BI-GROUP» حولدينگىنىڭ ەنشىلەس كومپانيالارى – «كاسپاكو» جانە «Bi Global» جشس-دا زاڭسىز جاسالعان قۇجاتتاردىڭ نەگىزىندە ورىن العان زاڭسىز ارەكەتتەرىنە كۇيىنىپ، ۇلىنىڭ وسى كاسىپورىنداردا 2 اي عانا جۇمىس ىستەپ، اياق-استىنان «96 000 000 (توقسان التى ميلليون) تەڭگەنىڭ ماتەريالىن ۇرلاپ كەتىپتى» دەگەن جالعان ايىپپەن 8 جىلعا سوتتالىپ كەتكەنىنە اراشا سۇرايدى.
«BI-GROUP» حولدينگىنىڭ ەنشىلەس كومپانيالارى – «كاسپاكو» جانە «Bi Global» جشس-ءنىڭ جەكە اقشاسى بولسا ءبىر ءسارى، بىراق مەملەكەتتىڭ تاپسىرىسىمەن مەملەكەتتىڭ قارجىسىنا مەملەكەتتىك مەكتەپتەر سالىنىپ جاتقانىن الماتى قالاسى الاتاۋ اۋداندىق سوتى مەن الماتى قالاسى قىلمىستىق ىستەر جونىندەگى القاسى مۇلدە ەلمەگەن. لدەتاەۆ، ارىستانبەكوۆ دەگەن قىزمەتكەرلەر جالعان كۋا بولىپ، ەرنار سەيدازوۆتىڭ موينىنا «كاسپاكو» جانە «Bi Global» جشس-ءنىڭ باسشىلىعى جىمقىرعان اقشانى كوزبوياۋشىلىقپەن ارتا سالعان. ادىلەتتىك ءۇشىن شىرىلداعان انانىڭ زارىنا كىم قۇلاق اسادى؟
وسى ءبىر كۇيىنگەن انانىڭ جانايقايىن Abai.kz وقىرماندارىنىڭ تالقىسىنا ءھام ەل باسشىلىعىنىڭ نازارىنا نازارىنا ۇسىنىپ وتىرمىز!
سۋرەت اقوردا سايتىنان الىندى
قازاقستان رەسپۋبليكاسىنىڭ
پرەزيدەنتى قاسىم-جومارت توقاەۆتىڭ نازارىنا!
قۇرمەتتى قاسىم-جومارت كەمەلۇلى!
سىزدەن الماتى قالاسى سوتتارىنداعى زاڭسىزدىق پەن ادىلەتسىزدىككە توسقاۋىل قويىپ، سوتتاردىڭ مەملەكەت قارجىسىنا قۇرىلىستار سالىپ جاتقان BI-GROUP حولدينگىنىڭ فيليالدارىنداعى قارجىلىق زاڭداردىڭ دورەكى بۇزىلۋىنا كوڭىل بولمەي، زاڭسىز، ادىلەتسىز شىعارعان سوت اكتىلەرىنىڭ كۇشىن جويۋعا ىقپال ەتۋىڭىزدى سۇرايمىز
الماتى قالاسى الاتاۋ اۋداندىق سوتى مەن الماتى قالاسى قىلمىستىق ىستەر جونىندەگى القاسى BI-GROUP حولدينگىنىڭ ەنشىلەس كومپانيالارى «كاسپاكو» جانە «Bi Global» جشس-دا زاڭسىز جاسالعان قۇجاتتاردىڭ نەگىزىندە مەنىڭ بالام سەيدازوۆ ەرنار اشيرحانۇلىن 8 جىلعا سوتتاپ جىبەردى.
الماتى قالاسىنىڭ سوتتارى BI-GROUP كومپانيالارىنداعى ورىن العان زاڭسىزدىقتارعا، ءتارتىپتىڭ جوقتىعىنا، قىزمەتكەرلەردىڭ جاۋاپسىزدىعىنا، اسىرەسە قارجى سالاسىنداعى ەرەجەلەردىڭ دورەكى بۇزىلۋىمەن جاسالعان قۇجاتتارعا كوز جۇمىپ وتىر.
ءىس بويىنشا: «مەنىڭ بالام 2 اي عانا جۇمىس ىستەپ، 96 000 000 (توقسان التى ميلليون) تەڭگەنىڭ ماتەريالىن ۇرلاپ كەتىپتى. ونىڭ ءبىر بولىگىن جۇمىسقا كىرمەي تۇرىپ-اق ۇرلاپتى. ماتەريالدىق جاۋاپتى قىزمەتكەرلەر - ۋچاسكە باسشىسى (قويما باستىعى) مەن جوبا جەتەكشىسى ماتەريال كىرگەن-كىرمەگەنىن تەكسەرمەي، ناكلادنويعا قابىلداپ الدىم دەپ قول قويا بەرىپتى. ول ۇرلانعان ماتەريال بۋحگالتەرلىك ەسەپپەن ءوتىپ، اقشاسى تولەنىپ كەتىپتى. ودان سوڭ دا ۇرلىق جاسالا بەرىپتى، ونى ەشكىم تەكسەرمەپتى، سەنىپ جۇرە بەرىپتى. ماتەريال وبەكتىگە كىردى مە، كىرمەدى مە ەشكىم قاراماپتى. ول ۇرلىقتى 5 ايدان كەيىن عانا انىقتاپتى».
سوندا بۇل نە دەگەن قاداعالاۋ جوق، اشىق-شاشىق قۇرىلىس؟
جاۋاپتى قىزمەتكەرلەر، قاۋىپسىزدىك قىزمەتى قايدا قارايدى؟
جالپى ماتەريالدىق قۇندىلىقتار نەگە دۇرىس ەسەپكە الىنىپ، دۇرىس سانالىپ، نۇسقاۋلىققا ساي دۇرىس الىنىپ-بەرىلمەيدى؟
الدە انىقتالعانى انىقتالىپ، انىقتالماعانى وڭدى-سولدى شاشىلىپ كەتىپ جاتىر ما؟ ماتەريالدار قۇرىلىس وبەكتىلەرىنە جەتىپ جاتىر ما؟ الدە قاعازبەن ون توننا، ال ناقتى ءبىر توننا كىرىپ، ساپاسىز قۇرىلىستار سالىنىپ جاتىر ما؟
سۇراق كوپ...
(سۋرەتتە اراشا سۇراعان اتا-انا)
BI-GROUP حولدينگىنىڭ قىزمەتكەرلەرى بۇل سۇراقتارعا جاۋاپ بەرە المادى. سەبەبى، بۇل BI-GROUP حولدينگى فيليالدارى قىزمەتكەرلەرىنىڭ، بۇرىننان سول جەردە تانىس-تۋىستىقپەن ورنىعىپ العان مامانداردىڭ الدىن-الا ۇيىمداستىرعان ءىس-اركەتىنىڭ ناتيجەسى دەپ سانايمىن.
BI-GROUP حولدينگى فيليالدارىنا ەگەر ول جەردە جاقىن تانىس-تۋىس بولماسا جۇمىسقا كىرۋ، ماتەريالدىق جاۋاپتى قىزمەتكە ورنالاسۋ مۇمكىن ەمەس ەكەن.
ال ەش تانىس-تۋىسى جوق مەنىڭ بالامدى اياق استىنان جۇمىسقا الىپ، 2 اي ىشىندە ءجۇز ميلليون اقشانى موينىنا ءىلىپ، قالعان جاۋاپتى ادامدار سىتىلىپ كەتتى. ول قىزمەتكەرلەر نەگە جاۋاپقا تارتىلمادى؟
سوت تا بۇل سۇراقتارعا جاۋاپ الۋعا تىرىسپادى!
سىزدەردەن شىندىقتى انىقتاۋدى سۇراپ جازىپ وتىرمىن.
مەنىڭ بالام سوت ۇكىمىمەن ايىپتى دەپ تانىلدى، بىراق سوت ءىستى ءادىل، زاڭدى قارامادى، زاڭسىز ۇكىم شىعاردى.
زاڭسىزدىقتىڭ دالەلى سول – مەنىڭ بالام جۇمىس ىستەمەگەن كەزدە جوعالعان زاتتاردى دا مەنىڭ بالامنىڭ موينىنا جۇكتەدى.
ونىڭ سىرتىندا جوعالماعان، ياعني تۇگەندەۋ كەزىندە وبەكتىدە بار بولعان زاتتى دا ۇرلادى دەپ سوتتاپ وتىر.
زاڭسىز ۇكىمنىڭ شىعۋىنا «كاسپاكو» جانە «Bi Global» جشس-ءنىڭ ماتەريالدىق جاۋاپتى تۇلعالارى مەن قارجىلىق قاۋىپسىزدىك ءبولىمى قىزمەتكەرلەرىنىڭ زاڭ تالاپتارىن دورەكى تۇردە بۇزا وتىرىپ جاساعان قۇجاتتارى نەگىز بولدى.
سول قىزمەتكەرلەر كەلتىرىلگەن شىعىننىڭ جاۋاپتىلىعىنان ءوز باستارىن الىپ قاشۋ ءۇشىن بارلىعىن مەنىڭ بالام ە.سەيدازوۆتىڭ موينىنا ىلۋگە بارلارىن سالدى، سول ءۇشىن سوتپەن زاڭسىز كەلىسىم جاسادى دەپ ويلايمىن.
(سۋرەتتە BI-Group حولدينگى ديرەكتورلار كەڭەسىنىڭ توراعاسى ايدىن راقىمباەۆ)
سەبەبى سوت:
- «كاسپاكو» جانە «Bi Global» جشس-ءنىڭ جاساعان تۇگەندەۋ تىزىمدەرى (ينۆەنتاريزاتسيوننىە وپيسي) قر قارجى ءمينيسترىنىڭ «بۋحگالتەرلىك ەسەپتى جۇرگىزۋ قاعيدالارىن بەكىتۋ تۋرالى» 2015 جىلعى 31 ناۋرىزداعى № 241 بۇيرىعىنىڭ ( قر ءام-ندە 2015 جىلى 6 مامىردا № 10954 تىركەلگەن) تۇگەندەۋ جۇرگىزۋ ءتارتىبى تۋرالى 4 تاراۋىنىڭ 61, 65, 67 تارماقتارىن ورەسكەل بۇزا وتىرىپ جاسالعانىنا;
- تۇگەندەۋ ءتىزىمىن جاساۋعا كوميسسيا مۇشەسى رەتىندە قول قويعان قىزمەتكەرلەردىڭ سوتتا وزدەرىنىڭ تۇگەندەۋگە قاتىسپاعانىن ايتقانىنا،
- تۇگەندەۋ ءتىزىمىن تۇگەندەۋگە قاتىسۋعا بولمايتىن ادامدار جاساعانىنا;
- «كاسپاكو» جانە «Bi Global» جشس-دا بۋحگالتەرلىك ءىس-قۇجاتتاردىڭ قالاي بولسا سولاي جاسالاتىنىنا، ول قۇجاتتار كىم كورىنگەننىڭ، ءتىپتى سول مەكەمەلەردە جۇمىس ىستەمەيتىن ادامداردىڭ قولىندا جۇرەتىنىنە
- جوعالدى دەگەن ماتەريالداردى ۋچاسكە باسشىلارى قابىلداپ الىپ، بۋحگالتەريا ارقىلى وتكىزىپ، جەتكىزۋشىلەرگە اقشاسىن تولەپ قويىپ، ودان سوڭ ول ماتەريال جوعالدى دەپ مەنىڭ بالاما جالا جاۋىپ وتىرعانىنا;
(سۋرەتتە ە.سەيدازوۆ)
- مەنىڭ بالام ە.سەيدازوۆ جۇمىس ىستەمەگەن كەزدە جوعالىپتى دەگەن ماتەريالدى دا مەنىڭ بالامنىڭ موينىنا ىلگەنىنە;
- تۇگەندەۋ ءتىزىمى مەن اۋديت، ساراپتاما جانە سوت ۇكىمى بويىنشا ماتەريالدار مەن شىعىن كولەمى بويىنشا ايىرماشىلىقتارعا;
- ءىس بويىنشا ماتەريالداردىڭ جەتكىزۋشى كومپانيالاردان ناقتى الىنعان-الىنباعانىن دالەلدەيتىن قۇجاتتاردىڭ جوقتىعىنا
- سوتتا «كاسپاكو» جانە «Bi Global» جشس-ءنىڭ قىزمەتكەرلەرى ءوز قىزمەتتىك مىندەتتەرى مەن بولعان جاعداي بويىنشا دۇرىس جاۋاپ بەرە الماي، ماتەريالداردىڭ جوعالۋىنا قالاي جول بەرىلگەنىن تۇسىندىرە الماعانىنا;
- قىزمەتكەرلەردىڭ جۇمىسقا دەگەن جاۋاپكەرشىلىگى جوقتىعىنا، ءوز مىندەتتەرىنە نەمقۇرايلى قاراۋلارىنا;
- پروكۋراتۋرانىڭ جوعالماعان، تۇگەندەۋ كەزىندە بار بولعان زاتتاردى دا ايىپتاۋعا كىرگىزگەنىنە قاراماستان زاڭسىز ۇكىم شىعاردى.
بۇل زاڭسىز ۇكىمنىڭ شىعۋىنا سول جاۋاپسىز قىزمەتكەرلەر مۇددەلى بولدى، ال پوليتسيا، پروكۋراتۋرا، سۋديالار سولاردىڭ ىقپالىندا كەتىپ وتىر دەپ ويلايمىن.
قۇرمەتتى قاسىم-جومارت كەمەلۇلى!
ءالى دە بولسا ادىلدىك، زاڭدىلىق بولادى دەپ ۇمىتتەنەمىن!
«كاسپاكو» جانە «Bi Global» جشس-دا جاسالعان جالعان قۇجاتتاردىڭ نەگىزىندە سوتتىڭ زاڭ تالاپتارىن بۇزا وتىرىپ شىعارعان ۇكىمىن قوعام تالقىسىنا سالىپ، تالقىلاۋ ءۇشىن جۋرناليستەرگە اقپارات بەرۋگە ءماجبۇر بولىپ وتىرمىن.
جانە سوتتارداعى ادىلەتسىزدىككە, BI-GROUP حولدينگىنىڭ ەنشىلەس كومپانيالارىنداعى تالان-تاراج بەن قارجىلىق زاڭسىزدىقتارعا باعا بەرۋ ءۇشىن سىزگە وسى حاتىمدى جولدايمىن.
سوتتا «كاسپاكو» جانە «Bi Global» جشس-ءنىڭ مەنىڭ بالامنان ماتەريالدى قابىلداپ الىپ، ناكلادنويلارعا قول قويىپ بەرگەن لدەتاەۆ، ارىستانبەكوۆ دەگەن قىزمەتكەرلەر «ول ماتەريالداردى كورگەن جوقپىز، سەيدازوۆقا سەنىپ قول قويدىق» دەپ جاۋاپ بەردى.
مەنىڭ بالامدى بۇرىن تانىمايتىن، بىلمەيتىن، تانىستىق-تۋىستىعى جوق ادامدار جۇمىسقا جاڭا كەلگەن ادامعا سەنىپ، قالاي ميلليونداعان اقشانىڭ قۇجاتتارىنا قول قويىپ بەرە بەرەدى؟ بۇل جاۋاپسىزدىق پا؟ جاۋاپسىزدىق!
جانە وسى جاۋاپسىزدىقتى سوت ول قىزمەتكەرلەر ءۇشىن قالىپتى جاعداي دەپ سانادى ەكەن. ولاردىڭ سوتتا ايتقان: «ءبىز ءبىر-بىرىمىزگە سەنىپ، تەكسەرمەي جۇمىس جاساي بەرەمىز»، - دەگەنىنە سەنە سالدى. بۇل سىبايلاسىپ قىلمىس جاساۋعا جول اشۋ دەپ سانايمىن!
ەگەر ول ولاردىڭ جەكە اقشاسى بولسا ءبىر ءسارى، بىراق مەملەكەتتىڭ تاپسىرىسىمەن مەملەكەتتىڭ قارجىسىنا مەملەكەتتىك مەكتەپتەر سالىنىپ جاتقانىن سوت مۇلدە ەلمەدى. مەملەكەتتىڭ اقشاسى وڭدى-سولدى شاشىلىپ جاتقان جوق پا؟ تالان-تاراجعا ءتۇسىپ جاتقان مەكتەپ قۇرىلىستارىنىڭ ساپاسى قانداي؟ دەگەن سۇراقتار قويىلمادى.
سىزگە ادۆوكاتتىڭ جازعان اپەللياتسيالىق شاعىمىن جولدايمىن.
شاعىمدا «كاسپاكو» جانە «Bi Global» جشس-ءنىڭ قىزمەتكەرلەرىنىڭ بۋحگالتەرلىك ەسەپ بويىنشا قانداي زاڭداردى بۇزىپ قۇجاتتار جاساعانى، سوتتا قانداي جاۋاپ بەرگەنى، جالپى وسى ەكى مەكەمەدە جۇمىستىڭ قالاي جۇرەتىنى تۋرالى تولىق سيپاتتالعان.
(سۋرەتتە سابازبەكوۆا گۋلميرا مۋحانباەۆنا - ادۆوكات)
وسى جاعدايلار الماتى قالاسى الاتاۋ اۋداندىق سوتىندا دا، الماتى قالاسىنىڭ اپللياتسيالىق القاسىندا دا ايتىلدى. ادۆوكاتتىڭ 14-بەتكە جازعان اپەللياتسيالىق شاعىمىندا كورسەتىلگەن پىكىرلەر مەن ۋاجدەمەلەرگە اپەللياتسيالىق ساتىنىڭ سۋديالارى ەشقانداي باعا بەرمەي, بار جوعى 3 بەتتىك قاۋلىدا «ءىستى قايتا قاراۋعا نەگىز جوق» دەپ پىكىر بىلدىرە سالدى.
ال زاڭدىلىقتى قاداعالاۋعا ءتيىس پروكۋراتۋرا ورگانىنىڭ قىزمەتكەرلەرى وزدەرى قىلمىستىق-پروتسەستىك كودەكستىڭ تالاپتارىن دورەكى بۇزا وتىرىپ، ادۆوكاتتىڭ ءىس ماتەريالدارى بويىنشا پىكىرىن قاراماي، جاۋاپ بەرمەي، 6 تومدىق قىلمىستىق ىسپەن جارتى كۇندە تانىسىپ سوتقا جولداپ، ودان سوڭ سوتتا نەگىزسىز ايىپتاۋ اكتىلەرىن 4 رەت قايتا-قايتا تۇزەتىپ سوتقا تاپسىرىپ، ادۆوكاتتىڭ زاڭ نورمالارىنىڭ بۇزىلۋىن انىقتاپ كورسەتىپ بەرگەنىنە قاراماستان جالعان دالەلدەمەلەرگە نەگىزدەلگەن ايىپتاۋ اكتىسىن قولداپ وتىر.
مەن بۇل ىستە سىبايلاس جەمقورلىق بار بولۋى مۇمكىن دەپ سانايمىن، سەبەبى BI-GROUP حولدينگىنىڭ فيليالدارى «كاسپاكو» جانە «Bi Global» جشس-ءنىڭ قارجىلىق قۇجاتتارىنا جاۋاپتى قىزمەتكەرلەرى وزدەرىنىڭ زاڭسىزدىقتارى مەن كەمشىلىكتەرىنەن جالتارۋ ءۇشىن مەنىڭ بالام ە.سەيدازوۆتى ايىپتاپ، وعان بار جاۋاپكەرشىلىكتى ارتۋ ءۇشىن قۇقىق قورعاۋ، پروكۋراتۋرا جانە سۋديالارمەن زاڭسىز كەلىسىم جاساماسا، وسىنشا زاڭسىزدىققا جول بەرىلمەس ەدى.
سول سەبەپتەن دە زاڭسىز، جالعان دالەلدەمەلەردى سوت قابىلداپ، ادىلەتسىز ۇكىم شىعاردى دەپ سانايمىن.
سوت جانە پروكۋراتۋرا ورگاندارىنا سەنىمىم قالمادى، ولارعا سەنە المايمىن.
سىزگە قازاقستان رەسپۋبليكاسى ازاماتتارىنىڭ ءومىرى مەن بوستاندىعىنىڭ كەپىلى رەتىندە وسى ارىزبەن جۇگىنىپ وتىرمىن.
مەنىڭ بالام ە.سەيدازوۆقا قاتىستى قىلمىستىق ءىس بويىنشا ورىن العان زاڭسىزدىقتاردى اشۋعا جانە ءادىل، زاڭدى شەشىمگە قول جەتكىزۋگە، ءىستى قايتا قاراۋعا، زاڭسىز ۇكىمنىڭ كۇشىن جويۋعا ىقپال جاساۋىڭىزدى سۇرايمىن.
اتا-انا جانە قوعامدىق قورعاۋشى كاميلا نۋرماحانوۆا، اشيرحان سەيدازوۆ
