جەتىسۋ وبلىسىندا اسكەرگە اتتانعانىنا ءۇش اي بولعان سارباز قايتىس بولدى، دەپ حابارلايدى «ادىرنا» ءتىلشىسى استانا ارناسىنا سىلتەمە جاساپ.
قورعانىس مينيسترلىگى ءامىر بايتۇرعانوۆتىڭ مەنينگيتتەن كەنەت قايتىس بولعانىن مالىمدەدى. الايدا مارقۇمنىڭ تۋىستارى ونىڭ اۋىرىپ ولگەنىنە سەنبەي وتىر. ايتۋلارىنشا، جاس جىگىت بىرنەشە اپتا بويى بۇيرەگى اۋىرعانىنا شاعىمدانىپ، ءتيىستى ەم قابىلداماعان.
«تۇنگى ساعات 03:00-دە اسكەري بولىمنەن قوڭىراۋ شالىندى. ولار ءسىزدىڭ ۇلىڭىز ەس-ءتۇسسىز جاتىر دەپ حابارلاپ، مەنىڭ بولىمگە دەرەۋ كەلۋىمدى سۇرادى. سول كۇنى تاڭعى ساعات 06:20-دا ۇلىم ەسىن بىلمەي كوز جۇمدى»،— دەيدى مارقۇمنىڭ اكەسى مۇرات بايتۇرعانوۆ.
باس اسكەري-مەديتسينالىق باسقارما باسشىسىنىڭ ورىنباسارى بەرىك ءىلياسوۆ ءامىردىڭ ءورت ءسوندىرۋ جاتتىعۋلارىنان كەيىن ءوزىن ناشار سەزىنگەنىن، سول كۇنى دەنە قىزۋى كوتەرىلىپ اۋرۋحاناعا تۇسكەنىن ايتتى.
«كەشكە قاراي ناۋقاستىڭ جاعدايى ناشارلادى. دەنە تەمپەراتۋراسى ەكسترەمالدى دەڭگەيگە دەيىن كوتەرىلدى. وسىدان كەيىن ناۋقاس ورتالىق وبلىستىق اۋرۋحاناعا جەتكىزىلدى. سوت-مەديتسينالىق ساراپتامانىڭ قورىتىندىسىنا سايكەس، ءولىمنىڭ الدىن الا سەبەبى جەدەل جۇقپالى اۋرۋ، مەنينگيت ەكەنى انىقتالدى»،—دەدى ول.
ساربازدىڭ تۋىسقاندارى ءولىمنىڭ بۇل نۇسقاسىنا سەنبەيتىندەرىن جەتكىزدى.
بۇعان دەيىن ول بۇيرەك اۋرۋى بويىنشا مەديتسينالىق بولىمشەگە بىرنەشە رەت جۇگىنگەن. 28 قاراشادا ۋلترادىبىستىق زەرتتەۋ جۇرگىزۋ ءۇشىن ءبولىمنىڭ مەديتسينالىق قىزمەت باسشىسىنا حابارلاسقان. تەك 6 جەلتوقساندا ولار قالاعا بارىپ،ۋدز-گە ءتۇسىپ، ەكى جاقتى پيەلونەفريت دياگنوزىن قويدى. ونى سول كۇنى-اق بىردەن اسكەري گوسپيتالعا جاتقىزعانىمەن، 3 كۇننەن كەيىن شىعارىپ جىبەردى»،—دەپ ءتۇسىندىردى مۇرات بايتۇرعانوۆ.
تۋىستارى جاس جىگىت سوزىلمالى پيەلونەفريتتەن كوز جۇمدى ەسەپتەپ وتىر. الايدا قورعانىس مينيسترلىگى بۇيرەك اۋرۋى مەن ءولىم اراسىنداعى بايلانىستى جوققا شىعارادى.
«5 جەلتوقساندا جاسالعان سوت-مەديتسينالىق دەرەكتەرگە سايكەس جانە اۋرۋدىڭ تاريحىن زەرتتەي كەلە، ءولىم سەبەبى اراسىندا ەش بايلانىس جوقتىعىن كورسەتەدى»،—دەدى بەرىك ءىلياسوۆ.
مارقۇمنىڭ اكەسى باس پروكۋراتۋراعا تەرگەۋ بارىسىن ەرەكشە باقىلاۋعا الۋدى سۇرادى.
