پاۆلودار قالاسىنىڭ تۇرعىنى ۇرلانعان كولىگىمەن پوليتسيانىڭ كوزىنشە ايالدامانى بۇزىپ، دۇكەندى ويرانداپ كەتتى، دەپ حابارلايدى «Adyrna» ۇلتتىق پورتالى.
پاۆلودار وبلىسىنىڭ پوليتسيا دەپارتامەنتىنىڭ حابارلاۋىنشا، پاۆلودار قالاسىنىڭ تۇرعىنى 1 قاڭتار كۇنى تاڭعى ساعات 07.30-دا ماس كۇيىندە اكادەميك بەكتۇروۆ كوشەسىندەگى ۇيلەردىڭ ءبىرىنىڭ اۋلاسىنان «گازەل» اۆتوكولىگىن ايداپ كەتكەن. سودان نۇركينا كوشەسىمەن كەلە جاتىپ، جول بەلگىسىن، ايالدامانى جانە دۇكەن عيماراتىن سوققان.
«جۇرگىزۋشىنى جاقىن ماڭداعى پوليتسيا قىزمەتكەرلەرى ۇستادى، تەكسەرۋ بارىسىندا ونىڭ جۇرگىزۋشى كۋالىگى جوق ەكەنى انىقتالدى. كولىك ىشىندە 17 جاستاعى كامەلەتكە تولماعان ءجاسوسپىرىم بولعان. جۇرگىزۋشى ساراپتامادان ءوتىپ، پاۆلودار قالاسىنىڭ ۋاقىتشا ۇستاۋ يزولياتورىنا قامالدى»، - دەپ حابارلادى پاۆلودار وبلىستىق پوليتسيا دەپارتامەنتىنىڭ ءباسپاسوز قىزمەتى.
قۇقىق بۇزۋشى جۇرگىزۋشى كۋالىگىنسىز ماس كۇيىندە كولىك جۇرگىزگەنى ءۇشىن 20 تاۋلىككە قاماۋعا الىندى.
ۇرلىق فاكتىسى بويىنشا سوتقا دەيىنگى تەرگەۋ باستالدى. كولىك ارنايى اۆتوتۇراققا قويىلدى.
