مەملەكەت باسشىسى قاسىم-جومارت توقاەۆتىڭ “ەگەمەن قازاقستان” گازەتىنە بەرگەن سۇحباتى جاريالاندى، دەپ حابارلايدى “ادىرنا” ۇلتتىق پورتالى.
سۇحبات بارىسىندا وتكەن جىلى بولعان ماڭىزدى ساياسي وقيعالارعا شولۋ جاسالىپ، ولاردىڭ ەل ءۇشىن ماڭىزدىلىعى اتالدى:
ء“بىز ءادىل جانە باسەكەلى ەكونوميكا جۇيەسىن قۇرۋعا كىرىستىك. ەكونوميكانى ءارتاراپتاندىرۋ جانە مونوپوليادان ارىلتۋ، ينفراقۇرىلىمدى جاڭعىرتۋ، بيزنەستى قولداۋ، ينۆەستيتسيا تارتۋ جۇمىستارىمەن مىقتاپ اينالىستىق. الەۋمەتتىك سالادا قوردالانىپ قالعان ماسەلەلەر بىرتىندەپ شەشىلە باستادى. ەلىمىزدىڭ تۇكپىر-تۇكپىرىندە ءبىلىم وشاقتارى، ونىڭ ىشىندە، «جايلى مەكتەپتەر» بوي كوتەرۋدە. اۋىلداردا دەنساۋلىق ساقتاۋ نىساندارى سالىنىپ جاتىر. الەۋمەتتىك تۇرعىدان وسال توپتاعى ازاماتتارعا كەشەندى تۇردە قولداۋ كورسەتۋ ءۇشىن الەۋمەتتىك كودەكس قابىلداندى. زياندى ەڭبەك جاعدايىندا جۇمىس ىستەيتىن ازاماتتار ءۇشىن ارنايى تولەماقى ەنگىزىلدى. تابيعاتتى قورعاۋعا جاۋاپتى مەكەمەلەردىڭ قىزمەتكەرلەرىنە ولاردىڭ ءومىرى مەن دەنساۋلىعىنا تونەتىن قاۋىپ-قاتەرگە قاتىستى ۇستەمەاقى تولەنەتىن بولدى. مەديتسينا قىزمەتكەرلەرىنىڭ، مەكتەپتە، كوللەدجدە جانە بالاباقشادا جۇمىس ىستەيتىن پەداگوگتەردىڭ جالاقىسى ءوستى. ۇلتتىق قوردان بالالارعا قارجى بەرۋ ماسەلەسىن رەتتەيتىن زاڭ كۇشىنە ەندى. نەگىزگى ەكونوميكالىق كورسەتكىشتەردى، ونىڭ ىشىندە ينفلياتسيا دەڭگەيىن ەسكەرە وتىرىپ ەڭ تومەنگى جالاقىنى انىقتايتىن ادىستەمە قابىلداندى” دەدى توقاەۆ.
سونداي-اق، ول قاڭتار وقيعاسىن بيلىكتەگى جوعارى لاۋازىمدى ادامدارعا ۇناماعان ساياسي جۇيەگە ۇناماۋ سالدارىنان جاسالعان دۇنيە دەپ اتادى:
“وسى جاڭا باعدارىمىز كەيبىر ىقپالدى ادامدارعا مۇلدە ۇناعان جوق. ولار بۇل وزگەرىستى ەلىمىزدە ابدەن تامىر جايعان جۇيەگە جانە بيلىك قۇرىلىمىنداعى وزدەرىنىڭ «ەرەكشە مارتەبەسىنە» تونگەن قاتەر دەپ قابىلدادى. مۇنداي ادامدار ەلدەگى وزگەرىسكە استىرتىن، كەيدە ءتىپتى اشىق قارسىلىق بىلدىرە باستادى. اقىر سوڭىندا رەفورمانىڭ بەتىن قايتارىپ، وزدەرىنە ىڭعايلى بۇرىنعى قالىپقا ورالۋ ءۇشىن ءبارىن تاس-تالقان ەتۋگە شەشىم قابىلدادى” دەدى ول.
