مەملەكەت باسشىسى قاسىم-جومارت توقاەۆ قازاقستاندىق ارۋلاردى حالىقارالىق ايەلدەر كۇنىمەن قۇتتىقتادى، دەپ حابارلايدى «ادىرنا» ءتىلشىسى اقورداعا سىلتەمە جاساپ.
«سۇلۋلىق پەن ۇيلەسىمدى ايشىقتايتىن شۋاقتى كوكتەم مەرەكەسىندە ءبىز بارشا اسىل جاندارعا ەرەكشە قۇرمەت كورسەتىپ، ىقىلاس-ءىلتيپات بىلدىرەمىز.
سىزدەر ءتۇرلى سالادا جەمىستى ەڭبەك ەتىپ، ەلىمىزدى وركەندەتۋگە بەلسەندى اتسالىسىپ كەلەسىزدەر. كەز كەلگەن شارۋاعا جاۋاپكەرشىلىكپەن قاراپ، ءاربىر ءىستىڭ بەرەكەسىن ارتتىرۋعا ۇيىتقى بولىپ جۇرسىزدەر»،—دەدى ول.
پرەزيدەنت ۇرپاق تاربيەسىمەن بىرگە قوعامعا پايدالى جۇمىستاردى دا قاتار اتقارىپ جۇرگەن نازىكجاندىلاردىڭ از ەمەس ەكەنىن اتاپ ءوتتى.
«ارداقتى انالار بۇكىل سانالى عۇمىرىن بالاسىنىڭ بولاشاعىنا ارناپ، وسكەلەڭ ۇرپاققا ءتالىم-تاربيە بەرىپ وتىر. وسى مارتەبەلى ميسسياسىن كاسىبي قىزمەتىمەن جانە قوعامعا پايدالى جۇمىستارمەن بىرگە اتقارىپ جۇرگەن ارۋلار دا از ەمەس.
ايەلدەرگە جان-جاقتى جاعداي جاساۋ، ولاردىڭ قۇقىعىن قورعاۋ جانە وتباسى ينستيتۋتىن نىعايتۋ – مەملەكەتتىك ساياساتتىڭ نەگىزگى باسىمدىعى.
ەلىمىزدىڭ قىز-كەلىنشەكتەرى جاسامپازدىق قاسيەتىمەن قوعامنىڭ قۇندىلىقتار جۇيەسىن جاڭارتۋعا جانە ادىلەتتى قازاقستاندى قۇرۋعا ولشەۋسىز ۇلەس قوسا بەرەدى دەپ سەنەمىن.
كوكتەم مەرەكەسى كوڭىلدەرىڭىزگە شاتتىق سىيلاسىن!
بارشاڭىزعا باق-بەرەكە جانە تولاعاي تابىس تىلەيمىن!»—دەدى قاسىم-جومارت كەمەلۇلى.
سونداي-اق مەملەكەت باسشىسى حالىقارالىق ايەلدەر كۇنىنە ارنالعان مەرەكەلىك شاراعا قاتىسىپ، «ارۋ-انا» ۇزدىك ايەلدەر جوباسى بايقاۋىنىڭ جەڭىمپازدارىن ماراپاتتادى. بۇل جولى ماراپات ءتۇرلى سالادا الەۋمەتتىك ماڭىزى بار جوبالاردى جۇزەگە اسىرىپ، ازاماتتىق قوعامنىڭ دامۋىنا ەلەۋلى ۇلەس قوسىپ جۇرگەن قىز-كەلىنشەكتەرگە التى نوميناتسيا بويىنشا تابىس ەتىلدى.
«ارۋ-انا» بايقاۋىنىڭ جەڭىمپازدارى:
«اۋىل ايەلدەرىن دامىتۋعا ارنالعان ۇزدىك جوبا» نوميناتسياسى بويىنشا – ەلشىباەۆا باقىتگۇل قازەزبايقىزى;
«عىلىم سالاسىنداعى ۇزدىك جوبا» نوميناتسياسى بويىنشا – شاكۋليكوۆا گۇلزادا تاڭىربەرگەنقىزى;
«ازاماتتىق سانا-سەزىمدى دامىتۋ باعىتىنداعى ۇزدىك جوبا» نوميناتسياسى بويىنشا – احمەدجانوۆا ءاليا سەرىكبولقىزى;
«ۇلتتىق مادەني مۇرانى ناسيحاتتاۋ باعىتىنداعى ۇزدىك جوبا» نوميناتسياسى بويىنشا – ميحاليوۆا اناستاسيا اناتولەۆنا;
«اگروبيزنەس سالاسىنداعى ۇزدىك جوبا» نوميناتسياسى بويىنشا – ارقاشباەۆا بوتاگوز ماحامبەتقاليقىزى;
«كرەاتيۆتى يندۋستريا سالاسىنداعى ۇزدىك جوبا» نوميناتسياسى بويىنشا – ەدىلبەكوۆا ءمادينا ەدىلبەكقىزى.
