سولتۇستىك قازاقستان وبلىسىندا ءتورت براكونەر سوتتالدى

استانا قالاسىنىڭ ەكى تۇرعىنى جانە ەكى سولتۇستىك قازاقستاندىق قىزىلجار اۋدانىنداعى ۇلتتىق تابيعي پاركتىڭ اۋماعىندا ەكى ەلىكتى زاڭسىز اتىپ العان. سقو پروكۋراتۋراسىنىڭ مالىمەتىنشە، ايىپتالۋشىلار ءوز كىناسىن مويىنداماعان جانە ىستەگەن ىستەرىنە وكىنىش بىلدىرمەگەن. پەتروپاۆل قالالىق سوتى ءتورت براكونەردى 3 جىلدان 4 جىلعا دەيىن باس بوستاندىعىنان ايىرۋ جازاسىن كەستى. سونداي-اق ولاردان كەلتىرىلگەن ماتەريالدىق شىعىن - 4,5 ملن تەڭگە ءوندىرىلىپ الىنادى. ۇكىم زاڭدى كۇشىنە ەنگەن جوق. بۇدان باسقا 53 ءسىبىر ەلىگىن زاڭسىز اتقان ۇيىمداسقان قىلمىستىق توپ قۇرامىنداعى 4 ادامعا قاتىستى ءىس قارالىپ جاتىر. قىلمىسكەرلەر كەلتىرگەن شىعىن 68 ملن تەڭگە. 2023 جىلى سقو سوتى زاڭسىز اڭشىلىق ءۇشىن بارلىعى 12 ءىس بويىنشا 21 ادامدى سوتتادى.

«ادىرنا» ۇلتتىق پورتالى