اقتوبە وبلىسىنداعى قوس اۋداندا اۋىل شارۋاشىلىعى ماقساتىنداعى جەردى كيىك تاپتاپ كەتتى. دالا جانۋارىنىڭ "جاپىرىپ" وتكەن اۋماعى 16 مىڭ گەكتار بولعان. بۇل جايلى "ادىرنا" ۇلتتىق پورتالى جازدى.
اقتوبە وبلىسىنىڭ ەگىندى اۋدانى سانالاتىن ايتەكە بيددەگى القاپتار كيىك تۇياعىنىڭ استىندا قالدى. شارۋالار كيىك كىرگەن القاپتا گەكتارىنان 8 تسەنتنەر ءونىم العان:
«القاپتا ءدان سەبۋ جۇمىسى اياقتالعان بويدا كيىك كەلدى، كوبەيىپ كەتتى. ايتەكە بي اۋدانىنىڭ قۇمقۇدىق اۋىلىنا جانگەلدين، اقتاستى اۋىلدارى جاعىنان كەلدى دەپ ايتسام بولادى. ونى قۋىپ، كەرى قايتارعانداي بولدىق. كەزەكشىلىك تە قويدىق. ەكى بريگادا جۇمىس ىستەدى. كولىكپەن ءجۇرىپ، كۇزەتتىك. دەگەنمەن كيىك ەگىن القابىنا كىرىپ كەتتى. سول جەردە جاتتى، تاپتاپ، قازىپ تاستادى جەردى. قازىر ەگىن جيناۋ جۇمىستارى ءجۇرىپ جاتىر. ارپا ەگىلگەن ءبىر القاپتىڭ ءار گەكتارىنان 13 تسەنتنەر ءونىم جينادىق. ال كيىك كىرگەن القاپتا گەكتارىنان 8 تسەنتنەر ءونىم الدىق. ياعني، كيىك كىرگەن سوڭ گەكتارىنان 4 تسەنتنەر جوعالتىپ تۇرمىز. بۇل ناقتى دەرەك. سوندا ءبىر ءتورتبۇرىش ىشىنەن، ياعني، القاپتان شامامەن 200 توننا جوعالتتىق. ءار تونناسى 60 مىڭ دەسەك، ءبىز 12 ملن تەڭگەدەن ايىرىلىپ وتىرمىز. سونىمەن بىرگە كيىك جۇرگەن جەردەگى القاپتىڭ گەكتارىنان 4 تسەنتنەر بيداي جينالدى. تاپتالماعان جەرىندە گەكتارىنان 8-9 تسەنتنەر الدىق. ءبارىن قۋىپ ءجۇرۋ مۇمكىن ەمەس. ءبىزدىڭ بريگادا 12-13 شاقىرىم جەرگە دەيىن قۋدى، ولار ءاپ-ساتتە قايتىپ كەلەدى. ونى اتۋعا، ۇرۋعا بولمايدى. شارۋالار كيىكتەن وزگە شەگىرتكەمەن دە كۇرەس جۇرگىزدى. قازىر دە قيىن. 25-تامىزدان بەرى جاڭبىر جاۋىپ تۇر. بۇل دا كەدەرگى كەلتىرىپ تۇر ورۋ جۇمىستارىنا. ءبىز كوميسسيا كەلىپ، شىعىندى قاراۋىن سۇرايمىز»،- دەدى «قۇمقۇدىق» جشس ديرەكتورى الەكساندر چەمودانوۆ.جالپى اقتوبە وبلىسىنىڭ ايتەكە بي، قوبدا اۋداندارىندا اۋىل شارۋاشىلىعى ماقساتىنداعى جەرلەردى كيىك تاپتادى. «ايتەكە بي اۋدانىنىڭ قۇمقۇدىق، سارات، سۇلۋكول، اقتاستى اۋىلدىق وكرۋگتەرى مەن قوبدا اۋدانىڭ وتەك اۋىلىندا تىركەلدى. بارلىعى 16 مىڭ گەكتارعا جۋىق جەر. شارۋالار ءۇشىن ەگىس القابىن ساقتاۋ قيىندىق تۋعىزدى. ولار قارجىلىق جاعدايىنا اسەر ەتەتىنىن حابارلادى. مينيسترلىككە حابار بەرىلدى»،- دەدى اقتوبە وبلىستىق اۋىل شارۋاشىلىعى جانە جەر قاتىناستارى باسقارماسىنىڭ ءبولىم باسشىسى نۇربەك رايىمباەۆ. اقتوبە وبلىستىق ورمان شارۋاشىلىعى جانە جانۋارلار دۇنيەسى وكىلدەرى وبلىستا بەتپاقدالا جانە ءۇستىرت پوپۋلياتسياسى بارىن ايتادى. بەتپاقدالا پوپۋلياتسياسىندا 100 مىڭ، ۇستىرتتە 30 مىڭ باس كيىك تىركەلگەن. ال قوبدا اۋدانى مەن رەسەيمەن شەكارالاس اۋماقتاعى ورال كيىك پوپۋلياتسياسىندا 4 مىڭ باس كيىك كەزدەسەدى. ينسپەكتورلار كيىك مەكەندەيتىن اۋداندارداعى جانۋار كوشڭ جايلى اقپارات بەرگەن. ورايى كەلگەندە ايتا كەتەيىك، شارۋالار كيىك سانىنا بولا بىرقاتار ايماقتاردا توتەنشە جاعداي ەنگىزۋ ماسەلەسىن ءجيى كوتەرىپ ءجۇر.
ۇقساس جاڭالىقتار
