بۇگىن شىمكەنت قالاسىنىڭ اكىمى عابيت سىزدىقبەكوۆ ءبىر وتباسىنى اجالدان اراشالاعان مارينا گافاروۆانىڭ شاڭىراعىندا بولدى. مارينانىڭ كوزسىز ەرلىگىنىڭ ارقاسىندا كامەلەت جاسىنا تولماعان التى بالا ورتتەن امان قالىپ، قاھارماندىعىنا ەل ءتانتى بولعان ەدى.
قالا اكىمى قاۋىپ-قاتەرگە قاراماستان وزگەنىڭ ءومىرىن قۇتقارعان ەرلىگىنە العىسىن جەتكىزىپ، مارينا گافاروۆاعا باسپانا جاعىنان قولداۋ كورسەتۋگە ۋادە بەردى. جاقىن ارادا شىمكەنتتىك باتىر كەلىنشەككە دەمەۋشىلەردىڭ كومەگىمەن جاڭادان سالىنىپ جاتقان تۇرعىن ۇيدەن 4 بولمەلى پاتەردىڭ كىلتى تابىستالاتىن بولادى.
ەسكە سالساق، وقيعا 16 جەلتوقسانعا قاراعان ءتۇنى ساعات 01:57-دە قايناربۇلاق ساياجايى، ورەحوۆايا كوشەسى №58 مەكەن جايىندا ورنالاسقان تۇرعىن ۇيدە بولعان. مارينا ءتۇن ورتاسىندا كورشى ۇيدەن شىققان قىزىل جالىندى بايقاپ، ءوز ومىرىنە قاۋىپ ءتونىپ تۇرسا دا، تەرەزەنى سىندىرىپ، بالالاردى قويۋ ءتۇتىننىڭ اراسىنان امان الىپ شىققان.
ال كوپبالالى انا م.گافاروۆانىڭ بۇل ەڭبەگى ەسكەرىلىپ، ەرلىگى مەن باتىلدىعى ءۇشىن توتەنشە جاعدايلار مينيسترلىگى تاراپىنان ناگرادتاۋعا دا ۇسىنىلعان بولاتىن.
«ادىرنا» ۇلتتىق پورتالى
