شىمكەنتتە 84 مىڭ دوللاردان استام جالعان اقشانى جۇمساماق بولعان اقشا جاساۋشىلار ۇستالدى، دەپ حابارلايدى "ادىرنا" ۇلتتىق پورتالى قارجى مونيتورينگى اگەنتتىگىنىڭ (قما) ءباسپاسوز قىزمەتىنە سىلتەپ.
«شىمكەنت قالاسى بويىنشا قما دەپارتامەنتى جالعان شەتەل ۆاليۋتاسىن ساتۋمەن اينالىسقان جالعان اقشا جاساۋشىلاردىڭ زاڭسىز ارەكەتىنىڭ جولىن كەستى. كەشەندى جەدەل-ىزدەستىرۋ ءىس-شارالارىنىڭ ناتيجەسىندە ءبىر توپ ادام 84 200 اقش دوللارى كولەمىندە جالعان اقشا ساتقانى ءۇشىن اشكەرەلەنىپ، كۇدىكتىلەر ۇستالىپ، سوتتىڭ سانكتسياسىمەن «ەكى ايعا قاماۋ» تۇرىندەگى بۇلتارتپاۋ شاراسى قولدانىلدى»، - دەلىنگەن حابارلامادا.
قما بۇعان دەيىن قىرعىزستاننىڭ ۇلتتىق قاۋىپسىزدىك مەملەكەتتىك كوميتەتى (ۇقك) قىرعىزستان مەن قازاقستاندا جالعان 100 دوللارلىق بانكنوتتاردى ساتقان ترانسۇلتتىق ۇيىمداسقان قىلمىستىق توپتى انىقتاپ، قىزمەتىن توقتاتقانىن ايتقان بولاتىن.
