قازاقستاندىق ءبىلىم بەرۋدە مەكتەپ باسشىلارى العاش رەت ارنايى وزدەرىنە جانە ولاردىڭ كاسىبي دامۋى مەن كوشباسشىلىعىنا ارنالعان تاقىرىپتىق فورۋمدا باس قوستى. NIS پەداگوگيكالىق شەبەرلىك ورتالىعى استانادا ءتورت جۇزدەن استام ديرەكتوردى بىرىكتىردى، التى جۇزدەن استام ديرەكتور ەلىمىزدىڭ بارلىق وڭىرلەرىنەن ونلاين قوسىلدى. ەكى كۇن بويى ولار تابىسقا جەتۋ ستراتەگياسىندا جەكە جانە كوماندالىق باسىمدىقتاردى انىقتادى.
«ءبىلىم بەرۋدەگى وزگەرىستەردىڭ 1000 كوشباسشىسى» كادرلىق رەزەرۆتى دايىنداۋ جونىندەگى پرەزيدەنتتىك باعدارلامانىڭ العاشقى تۇلەكتەرى حالىقارالىق ينتەنسيۆتىڭ نەگىزگى دەلەگاتتارى اتاندى. ولاردىڭ بارلىعى پەداگوگيكالىق شەبەرلىك ورتالىعىندا وقۋلارىن اياقتاپ، ماماندىققا جاڭا قادام جاساۋعا دايىن.
وقۋ-اعارتۋ مينيسترلىگىنىڭ ورتا ءبىلىم بەرۋ كوميتەتىنىڭ توراعاسى قانىبەك جۇماشەۆ پەن «نازارباەۆ زياتكەرلىك مەكتەپتەرى» دببۇ باسقارما توراعاسى ءانۋار جانعوزين ينتەنسيۆتىڭ اشىلۋ سالتاناتىندا پرەزيدەنتتىك كادرلىق رەزەرۆتى دايىنداۋ بويىنشا اۋقىمدى باعدارلامانىڭ بىرەگەيلىگىن ەرەكشە اتاپ ءوتتى.
باعدارلاما وتاندىق ءبىلىم بەرۋدىڭ توپ-مەنەدجەرلەرىنە ارنالعان ەڭ وزەكتى جانە كرەاتيۆتى فورماتتاردى قامتيدى: «قالاي تابىسقا جەتۋگە بولادى؟» كەيس-سەسسيالارى، ەموتسيونالدى قۇزىرەتتىلىك بويىنشا كرەاتيۆتى پراكتيكۋم، مەكتەپتەگى Talent-Management بويىنشا «مۇعالىمدەردى شابىتتاندىرامىز» فورسايت-سەسسياسى، اتا-انالار، وقۋشىلار جانە مەكتەپ باسشىلارىنا ارنالعان ۇجىمدىق ديسكۋسسيا، «تسيفرلىق مەنەدجمەنتكە ارنالعان قۇرالدار» Digital-سەسسيا جانە باسقالارى.
شەتەلدىك تاجىريبەلەردى «360-مەكتەپتىڭ» تەڭ ديرەكتورى، بريتاندىق ءبىلىم بەرۋدى زەرتتەۋ قاۋىمداستىعى كەڭەسىنىڭ مۇشەسى سارا سەلەزنەۆ، تاللين عىلىمي مەكتەبىنىڭ باسشىسى، ەستونيا مۇعالىمدەرى وداعىنىڭ توراعاسى مەديس سومەلار، سينگاپۋرداعى اربينگەر ينستيتۋتىنىڭ قاۋىمداستىرىلعان كەڭەسشىسى ساراس مەنون تانىستىردى. ولاردىڭ بارلىعى جاھاندىق پەداگوگيكاداعى ستراتەگيالىق جانە جۇمىس الگوريتمدەرى ءبىر ەكەنىن جانە كوشباسشىلاردىڭ نەگىزگى باعدارى كوپ جاعدايدا ۇلتتىق ءبىلىم بەرۋ جۇيەسىنە ەمەس، كوشباسشىلاردىڭ جەكە ستاندارتتارىنا بايلانىستى ەكەنىن راستادى.
تاجىريبە ءۇشىن وتە قىزىقتى جانە ماڭىزدى تاقىرىپتار. مەن كوپتەگەن پايدالى اقپاراتتاردى ءبىلدىم جانە العان ءبىلىمىمدى تاجىريبەدە ءساتتى قولدانا الامىن دەپ ويلايمىن. ءارتۇرلى ەلدەردەن كەلگەن ارىپتەستەرمەن تانىسقانىما، ولاردىڭ وقىتۋ ادىستەرى مەن تاجىريبەسىنە وتە قۋانىشتىمىن. ماعان سەمينارداعى جۇمىس قارقىنى، ءوز پىكىرىن ءبىلدىرۋ، تاجىريبە الماسۋ مۇمكىندىگى، سەمينار بارىسىندا ارىپتەستەر اراسىنداعى جىلى اتموسفەرا قاتتى ۇنادى، – دەيدى ەسكەلدى اۋدانى قارابۇلاق ورتا مەكتەپ ديرەكتورىنىڭ وقۋ ءىسى جونىندەگى ورىنباسارى ايگۇل كوساحباەۆا.
«ءبىلىم بەرۋدەگى كوشباسشى باعدارى» – پەداگوگيكالىق شەبەرلىك ورتالىعىنىڭ مەكتەپ باسشىلارىنىڭ كادر رەزەرۆىن دايىنداۋ جانە مۇعالىمدەر مەن مەكتەپ باسشىلارىنىڭ بىلىكتىلىگىن ارتتىرۋداعى اۋقىمدى جۇمىسىنىڭ قيسىندى جالعاسى.
