ەلوردادا ەكى ايعا سوزىلعان كوماندالىق شاحماتتان باق وكىلدەرى اراسىنداعى چەمپيونات ءوز مارەسىنە جەتتى. العاشقى ماۋسىمنىڭ شەشۋشى ويىندارى ءوتىپ، «ادىرنا» كومانداسى جەڭىسكە جەتتى.
باق ليگانىڭ باسقا باسەكەلەردەن ايىرماشىلىعى – مۇندا تەك باق وكىلدەرى قاتىسا الادى. العاش 2016 جىلدىڭ جەلتوقسانىندا باستالعان جوباعا بۇگىنگە دەيىن 70-تەن استام باق رەداكتسيالارىنان 1000-عا جۋىق باق وكىلدەرى قاتىستى.
باق وكىلدەرى اراسىندا العاش رەت وتكەن كوماندالىق شاحمات چەمپيوناتىنا ەلىمىزدىڭ ءارتۇرلى جۋرناليستەرىنەن قۇرالعان 6 كوماندا قاتىستى. توپتىق ءتۋرنيردىڭ ناتيجەسىندە جارتىلاي فينالعا جولداما العان 4 كوماندا بەلگىلى بولدى. ولار: «قازمەديا» ورتالىعى، «Dıxınews.kz» سايتى، «قازاقستان» ۇلتتىق ارناسى جانە «ادىرنا» ۇلتتىق پورتالى.
كوماندالىق شاحماتتىڭ كلاسسيكالىق شاحماتتان ەرەكشەلىگى – مۇندا ءبىر تاقتادا 4 ويىنشىدان بولىنگەن ەكى كوماندا وينايدى. پارتيا 36 جۇرىستەن تۇرادى. العاشقى 12 جۇرىستە ويىنشىلار ءبىر-بىرىمەن اقىلداسپاي، كەزەگىمەن جۇرەدى. كەلەسى 12 جۇرىستە ءوزارا تالقىلاسۋعا مۇمكىندىك الادى. ەگەر وسى ارالىقتا دا جەڭىمپاز انىقتالماسا، وندا سوڭعى 12 ءجۇرىس بولىپ، ويىنشىلار ءبىر-بىرىمەن اقىلداسپاي جۇرەدى. ءار كوماندا قۇرامىندا كەم دەگەندە ءبىر ايەل جۋرناليست بولۋى كەرەك.
«چەمپيون بولدىق، ءتۋرنيردىڭ «مىرزاسى» دا اتاندىق، ءتىپتى «قۇرمەت» نوميناتسياسىن دا الدىق. نە كەرەك باسقا؟ ەندى ەۋروپاعا كەتە بەرۋگە بولادى! Baqliga شاحمات ءتۋرنيرى ەكى اي دەگەندە مارەسىنە جەتتى. ارمان اۋباكىر باستاعان «ادىرنا» كومانداسى ۇزدىك اتاندى. فينالدا Qazaqstan تەلەارناسىن جەڭدىك. نەگىزگى فاۆوريت قارسىلاس Kazmedia ەدى، ولاردىڭ اسىعى الشىسىنان تۇسپەدى.
ءازيز ءجۇمادىل مىقتى شوۋ-تۋرنير ۇيىمداستىرا الدى. كەلەسى ماۋسىمدا كوماندالار سانى بۇدان دا كوپ بولارى ءسوزسىز، ارىپتەستەر، وسى باستان دايىندالىڭىزدار»، - دەپ الەۋمەتتىك جەلىدە جازبا جاريالادى كوماندا ويىنشىسى اسقار بەكوۆ.
كوماندالىق شاحماتتان باق ليگا ءبىرىنشى ماۋسىمىنىڭ باستى اقپاراتتىق قولداۋشىسى - «ادىرنا» ۇلتتىق پورتالى. اگەنتتىك باسشىسى، كوماندا جەتەكشىسى ارمان اۋباكىر جوبا جايلى:
«Baqliga ۇيىمداستىرعان شاحمات جارىسى كەرەمەت دەڭگەيدە وتۋدە. ەموتسياعا، سترەسس پەن قۋانىشقا تولى تارتىستى ويىن ءوتىپ جاتىر. «ادىرنا» ۇلتتىق پورتالى دا وسى ويىنعا ءوز كومانداسىن قوسىپ جاتىر، سونداي-اق اقپاراتتىق دەمەۋشىلەردىڭ قاتارىندا. ياعني ءبىز دە سايىسقا ءوز ۇلەسىمىزدى قوسىپ جاتىرمىز. وسىنداي ءماندى ءارى قىزىقتى ويىندار بولاشاقتا ارى قاراي جالعاسىن تابۋىنا تىلەكتەسپىز»، - دەپ پىكىرىن ءبىلدىردى.
«ادىرنا» ۇلتتىق پورتالى
