بالقاشتا بالالاردى ۇرىپ-سوعىپ، قورلاعانى ءۇشىن ايىپتالعان «ەر توستىك» بالاباقشاسىنىڭ تاربيەشىسىنىڭ كومەكشىسىنە ۇكىم شىقتى، دەپ حابارلايدى «ادىرنا» ۇلتتىق پورتالى.
اعىمداعى جىلدىڭ ناۋرىز ايىندا بالقاش قالاسىنداعى مەكتەپكە دەيىنگى مەكەمەدە جانجال شىققان بولاتىن. تۇزەتۋ توبىنداعى بالالاردىڭ اتا-انالارى بالالارىن بالاباقشادا كۇتۋشىنىڭ ۇرىپ-سوعىپ، قورلاعانىن ايتىپ، بەينەجازبا ءتۇسىرىپ العان. اتالعان وقيعاعا بايلانىستى بالالاردى ازاپتاۋ فاكتىسى بويىنشا قىلمىستىق ءىس قوزعالدى.
قىلمىستىق ءىس جاقىندا بالقاش قالالىق سوتىندا قارالدى. سوت كۇدىكتىنىڭ 2022 جىلدىڭ 22 قىركۇيەگى مەن 20 جەلتوقسانى ارالىعىندا ەكى بالانى ۇرىپ-سوعىپ، قورلاعانىن انىقتادى. ايىپتالۋشى ءوز كىناسىن مويىندادى.
ءىستىڭ بارلىق ماتەريالدارىن زەردەلەگەن سوت سوتتالۋشىنى كىنالى دەپ تانىپ، وعان 4 جىلعا باس بوستاندىعىن شەكتەۋ جازاسىن تاعايىندادى جانە 3 جىلعا بالالارمەن جۇمىس ىستەۋ قۇقىعىنان ايىردى.
بالقاش قالالىق سوتىنىڭ قىزمەتىنىڭ مالىمدەۋىنشە، ۇكىم ءالى زاڭدى كۇشىنە ەنگەن جوق.
ەسكە سالايىق، 2023 جىلدىڭ ناۋرىز ايىندا بالقاشتاعى بالاباقشادا سويلەۋ قابىلەتى بۇزىلعان بالالاردىڭ اتا-انالارى توپتا ورناتىلعان باقىلاۋ كامەراسىنىڭ جازباسىنان مۇعالىمنىڭ بالالاردى قالاي قورلاعانىن كورگەن. سونىمەن قاتار قاراعاندىدا جەكەمەنشىك بالاباقشانىڭ اتا-اناسى بۇلدىرشىندەرىنىڭ دەنەلەرى كوگەرگەنىن ايتىپ شاعىمدانعان.
«ادىرنا» ۇلتتىق پورتالى
