قازاقستانداعى بالا قۇقىقتارى جونىندەگى ۋاكىل دينارا زاكيەۆا الماتىنىڭ بالاباقشالارىنىڭ بىرىندە قاتارلاستارىنىڭ بالانى اياۋسىز ۇرىپ-سوعۋىنا قاتىستى پىكىر ءبىلدىردى، دەپ حابارلايدى "ادىرنا" ۇلتتىق پورتالى.
ول بالاباقشادا بالانى ۇرىپ-سوعۋ فاكتىسى بويىنشا قىلمىستىق ءىس قوزعالىپ، بۇل ىستە اتا-انالاردىڭ اكىمشىلىك جاۋاپكەرشىلىككە تارتىلاتىنىن اتاپ ءوتتى.
"الماتىنىڭ بالا قۇقىقتارى جونىندەگى ۋاكىلى ديانا ەرلان زارداپ شەككەن بالانىڭ اۋرۋحانادا، اجەسىنىڭ جانىندا، جاعدايى ورتا دارەجەلى اۋىرلىقتا ەكەنىن ايتادى. قازىرگى ۋاقىتتا جاعدايدىڭ تولىق ءمان-جايى زەرتتەلىپ، بالالاردىڭ مىنەز – قۇلقىنىڭ، قاتىگەزدىگىنىڭ سەبەپتەرىنە تالداۋ جۇرگىزىلۋدە",- دەپ جازدى دينارا زاكيەۆا Instagram الەۋمەتتىك جەلىسىندە.
ەسكە سالا كەتەيىك، 2024 جىلعى 23 اقپاندا الەۋمەتتىك جەلىلەردە تارالعان كادرلاردا الماتى بالاباقشالارىنىڭ بىرىندە توپتاعى بىرنەشە بالا وزدەرى قاتارلاس بالانى اياۋسىز ۇرىپ-سوققانى كورسەتىلگەن بەينەجازبا تاراعان. زارداپ شەككەن بالانىڭ اتا-اناسىنىڭ ايتۋىنشا، وقيعا 21 اقپاندا بالالار قاراۋسىز قالعان كەزدە بولعان. بالاباقشا باسشىسى مەن تاربيەشىسى جازالانىپ، پوليتسيا قىلمىستىق ءىس قوزعادى.
"ادىرنا" ۇلتتىق پورتالى
