قاراعاندى وبلىسى قارقارالى اۋدانىنىڭ اكىمى ءادىلجان ارعىنوۆ ورتكە قاتىستى جەرلەستەرىنە ۇندەۋ جولدادى. بۇل تۋرالى ول Instagram-داعى پاراقشاسىندا جاريالادى، دەپ حابارلايدى “ادىرنا” ۇلتتىق پورتالى.
اۋدان باسشىسى الدىمەن جەرلەستەرىنە ءورت ءسوندىرۋ جۇمىستارى تۋرالى اقپارات بەردى.
“قۇرمەتتى اۋدان تۇرعىندارى! وزدەرىڭىزگە ءمالىم، اۋدانىمىزدا ۇلكەن دالا ءورتى بولىپ جاتىر. وسى ءورت ءسوندىرۋ جۇمىستارىن دۇرىس ۇيىمداستىرۋ ءۇشىن تەرەكتى اۋىلىندا جەدەل شتاب قۇرىلعان. مەن جانە وبلىس اكىمىنىڭ ورىنباسارى وسى جەردەمىز. جالپى ءورت ءسوندىرۋ جۇمىستارىنا 386 ادام، 64 تەحنيكا، سونىمەن قاتار، تجم مەن قورعانىس مينيسترلىگىنىڭ تىكۇشاقتارى جۇمىلدىرىلعان”، - دەدى ول.
ارتىنشا ءادىلجان ارعىنوۆ الەۋمەتتىك جەلىلەردە ءورت ءسوندىرۋ جۇمىستارىنا قاتىستى جالعان اقپارات تاراپ جاتقانىن ايتتى.
“قادىرلى جەرلەستەر! قازىر الەۋمەتتىك جەلىلەردە كومەك كورسەتۋ نەمەسە قاراجات جيناۋ بويىنشا ءارتۇرلى مالىمەت تاراپ جاتىر. وسىعان وراي، جاۋاپتى ماماندار كومەكتى دۇرىس ۇيلەستىرمەگەن نەمەسە ۇيىمداسپاعان دەگەن اقپاراتتىڭ جالعان ەكەنىن ەسكەرتكىم كەلەدى. قازىر بارلىق قاجەتتى كۇش-قۇرالدارىمىز جەتكىلىكتى. ساربازدارىمىزدىڭ تاماعى، دەمالاتىن ورىندارى، سونىمەن قاتار، جانار-جاعارماي ماتەريالدارى تولىق قامتاماسىز ەتىلگەن. سوندىقتان قازىر بارلىق ءورت ءسوندىرۋ جۇمىسى ءتيىستى دەڭگەيدە ۇيىمداستىرىلعان”، - دەدى ول.
وسى رەتتە اۋدان اكىمى تۇرعىنداردى سابىرعا جانە جالعان اقپاراتقا سەنبەۋگە شاقىردى.
