استانادا «قازاق تاريحي قوعامى» قوعامدىق بىرلەستىگى قۇرىلىپ، رەسمي تۇردە تىركەلدى. باستاماشى توپ اراسىندا سۇلتان اكىمبەكوۆ، راديك تەمىرعاليەۆ، ارمانجان بايتاسوۆ، مايا بەكباەۆا سىندى تانىمال تۇلعالار بار، دەپ حابارلايدى ”ادىرنا” ۇلتتىق پورتالى.
قوعامدىق بىرلەستىكتىڭ ماقساتى - تاريح عىلىمىن دامىتىپ، فەيك جانە بۇرمالانعان دەرەكپەن كۇرەسۋ. جاڭا قۇرىلىمعا تاريحشىلار، كورنەكتى زەرتتەۋشىلەر، زيالى قاۋىم وكىلدەرى، مىقتى دەگەن ساراپشىلار مۇشە.
«ءبىزدىڭ قىزمەت قازاقستان حالقىنىڭ ۇلتتىق بىرەگەيلىگىن ساقتاۋعا باعىتتالادى. ارى ەل تاريحىن وبەكتيۆتى تۇردە زەرتتەۋ ءۇشىن وزگە دە ۇيىممەن بايلانىس ورناتادى. وسىلايشا «قازاق تاريحي قوعامى» عالىمدار مەن تاريحشىلاردىڭ باسىن بىرىكتىرەتىن ەڭ بەدەلدى ساراپتامالىق ۇيىمعا اينالۋدى كوزدەپ وتىر. ءساتىن سالسا، قوعامدىق بىرلەستىكتىڭ ايماقتاردا بولىمشەلەرى دە اشىلادى”، دەدى بىرلەستىك وكىلدەرى.
قوعامدىق بىرلەستىك ۇلتتىڭ تاريحي ساناسى مەن تاريح عىلىمىن دامىتۋدى ماقسات ەتىپ وتىر. تاريحي زەرتتەۋلەر مەن كوپشىلىككە ارنالعان عىلىمي ادەبيەتتەر، سول زەرتتەۋ ناتيجەلەرىن دارىپتەيتىن فيلم، وزگە دە تۋىندىلاردى جاساۋ ءۇشىن ۇزدىكتەردى تارتۋ، ساپالى ىرىكتەۋ جۇرگىزۋ كوزدەلگەن.
«كوپتەگەن ەلدەردە وسىنداي تاريحي قوعامدار بار، ويتكەنى بۇل عالىمدار ءۇشىن، جۋرناليستەر مەن قوعام وكىلدەرى ءۇشىن الاڭ قۇرۋعا مۇمكىندىك بەرەتىن بىرلەستىكتەر. ءبىزدىڭ تاريحشىلار، ولكەتانۋشىلار ءوز ايماعىنىڭ تاريحىن ءوز بەتىنشە، ەش قولداۋسىز زەرتتەپ ءجۇر. مۇنى جۇيەلەۋ قاجەت. بىرلەستىكتىڭ ماقساتتارى مەن مىندەتتەرى ۋاقىت وتە كەلە تۇزەتىلەدى، بىراق ەڭ باستىسى – وسى كۇش-جىگەردى شوعىرلاندىرۋعا مۇمكىندىك بەرەتىن الاڭ قۇرۋ. ءبىزدىڭ ەسىگىمىز بارلىعىنا اشىق. قازىردىڭ وزىندە بىرلەستىكتىڭ مۇشەسى بولعىسى كەلەتىندەر ءوتىنىش بىلدىرۋدە. مەملەكەتتىك، كۆازيمەملەكەتتىك تاريحي ۇيىمدارمەن باسەكەگە ءتۇسۋ ويدا جوق. ولارمەن بايلانىس ورناتىپ، ورتاق مۇددە – تاريحي سانا مەن تاريح عىلىمىن دامىتۋعا ءوز ۇلەسىمىزدى قوسپاقپىز»، - دەيدى تاريحشى راديك تەمىرعاليەۆ.
ۇيىمداستىرۋشىلاردىڭ ايتۋىنشا، جوبا ءساتتى جۇزەگە اسسا، قوعامدىق بىرلەستىك اۋقىمى ايماقتارعا تاراتىلادى.
