Astanada «Qazaq tarıhı qoǵamy» qoǵamdyq birlestigi qurylyp, resmı túrde tirkeldi. Bastamashy top arasynda Sultan Ákimbekov, Radık Temirǵalıev, Armanjan Baıtasov, Maıa Bekbaeva syndy tanymal tulǵalar bar, dep habarlaıdy ”Adyrna” ulttyq portaly.
Qoǵamdyq birlestiktiń maqsaty - tarıh ǵylymyn damytyp, feık jáne burmalanǵan derekpen kúresý. Jańa qurylymǵa tarıhshylar, kórnekti zertteýshiler, zııaly qaýym ókilderi, myqty degen sarapshylar múshe.
«Bizdiń qyzmet Qazaqstan halqynyń ulttyq biregeıligin saqtaýǵa baǵyttalady. Ári el tarıhyn obektıvti túrde zertteý úshin ózge de uıymmen baılanys ornatady. Osylaısha «Qazaq tarıhı qoǵamy» ǵalymdar men tarıhshylardyń basyn biriktiretin eń bedeldi saraptamalyq uıymǵa aınalýdy kózdep otyr. Sátin salsa, qoǵamdyq birlestiktiń aımaqtarda bólimsheleri de ashylady”, dedi birlestik ókilderi.
Qoǵamdyq birlestik ulttyń tarıhı sanasy men tarıh ǵylymyn damytýdy maqsat etip otyr. Tarıhı zertteýler men kópshilikke arnalǵan ǵylymı ádebıetter, sol zertteý nátıjelerin dáripteıtin fılm, ózge de týyndylardy jasaý úshin úzdikterdi tartý, sapaly irikteý júrgizý kózdelgen.
«Kóptegen elderde osyndaı tarıhı qoǵamdar bar, óıtkeni bul ǵalymdar úshin, jýrnalıster men qoǵam ókilderi úshin alań qurýǵa múmkindik beretin birlestikter. Bizdiń tarıhshylar, ólketanýshylar óz aımaǵynyń tarıhyn óz betinshe, esh qoldaýsyz zerttep júr. Muny júıeleý qajet. Birlestiktiń maqsattary men mindetteri ýaqyt óte kele túzetiledi, biraq eń bastysy – osy kúsh-jigerdi shoǵyrlandyrýǵa múmkindik beretin alań qurý. Bizdiń esigimiz barlyǵyna ashyq. Qazirdiń ózinde birlestiktiń múshesi bolǵysy keletinder ótinish bildirýde. Memlekettik, kvazımemlekettik tarıhı uıymdarmen básekege túsý oıda joq. Olarmen baılanys ornatyp, ortaq múdde – tarıhı sana men tarıh ǵylymyn damytýǵa óz úlesimizdi qospaqpyz», - deıdi tarıhshy Radık Temirǵalıev.
Uıymdastyrýshylardyń aıtýynsha, joba sátti júzege assa, qoǵamdyq birlestik aýqymy aımaqtarǵa taratylady.
