استانا قالاسى ءماسليحاتىنىڭ دەپۋتاتتارى «ارەكەت ەتۋ ۋاقىتى» ءوزىن-ءوزى باسقارۋ كوشباسشىلارىنىڭ رەسپۋبليكالىق قۇرىلتايىنا قاتىسۋشىلارمەن كەزدەسىپ، الەۋمەتتىك باستامالاردى تالقىلادى، دەپ حابارلايدى ەلوردا اكىمدىگىنىڭ رەسمي سايتى.
ءىس-شاراعا قر وڭىرلەرىنەن مەكتەپ پارلامەنتتەرىنىڭ 20-عا جۋىق پرەزيدەنتى مەن ەلوردالىق ءماسليحات دەپۋتاتتارى قاتىستى. اشىلۋ سالتاناتىندا استانا قالاسى ءماسليحاتى توراعاسىنىڭ م.ا. اسقار سماعۇلوۆ قۇتتىقتاۋ ءسوز سويلەدى.
«بۇگىن ءبىز جاستاردى، مەكتەپ قاۋىمىن تولعاندىراتىن ماسەلەلەردى تالقىلاۋ ءۇشىن جينالدىق. ارىپتەستەرىم ءماسليحاتتىڭ قىزمەتى تۋرالى ايتىپ، ءوز تاجىريبەلەرىمەن بولىسەدى. سىزدەردىڭ ارقايسىڭىز ءوز مەكتەبىڭىزدە ءتۇرلى ماسەلەلەر مەن قيىندىقتارعا كەزىگىپ، ولاردى شەشۋدىڭ بىرەگەي جولدارىن تاۋىپ، جاڭا يدەيالار ەنگىزىپ، مەكتەپ ءومىرىن قىزىقتى ءارى مازمۇندى ەتۋگە كومەكتەسەتىن ءىس-شارالار مەن جوبالاردى ۇيىمداستىرىپ جاتقاندارىڭىزعا سەنىمدىمىن. سىزدەردىڭ كۇش-جىگەرلەرىڭىز قازىردىڭ وزىندە جەمىسىن بەرىپ جاتىر، بىراق بۇل ساپاردىڭ باسى عانا ەكەنىن ءتۇسىنۋ ماڭىزدى»، - دەدى ول.
اسقار سماعۇلوۆ سونداي-اق مۇنداي كەزدەسۋلەر جاستار ءۇشىن وزەكتى ماسەلەلەردى جاقسى تۇسىنۋگە ىقپال ەتەتىنىن جانە قالالىق دەڭگەيدە شەشىم قابىلداۋ جۇيەسى تۋرالى بىلۋگە كومەكتەسەتىنىن اتاپ ءوتتى.
«قۇرمەتتى قاتىسۋشىلار، وسى ۋاقىتتى بەلسەندى پايدالانۋعا شاقىرامىن: جوبالارىڭىزبەن، تاجىريبەلەرىڭىزبەن ءبولىسىڭىز، سۇراقتار قويۋدان قورىقپاڭىز، تولعاندىراتىن تاقىرىپتاردى تالقىلاڭىز. بۇل كەزدەسۋ سىزگە جاڭا دوستار مەن پىكىرلەستەردى تابۋعا، ءسىزدىڭ ۇمتىلىستارىڭىزدا جالعىز ەمەس ەكەنىڭىزدى، الەمدى جاقسىراق ەتۋدى قالايتىن جانە باسقا جىگىتتەردىڭ بار ەكەنىن كورۋگە مۇمكىندىك بولسىن. ال ءبىز ءوز كەزەگىمىزدە سىزدەردىڭ يدەيالارىڭىزدىڭ جۇزەگە اسۋىن جەڭىلدەتىپ، ىستەرىڭىزدە تابىسقا جەتۋگە بار كۇشىمىزدى سالامىز»، – دەپ تۇيىندەدى ءسوزىن اسقار سماعۇلوۆ.
ءىس-شارانى ۇيىمداستىرۋشىلار اتاپ وتكەندەي، كەزدەسۋدىڭ نەگىزگى ماقساتى – جاستار مەن ءماسليحات وكىلدەرى اراسىنداعى بايلانىستى نىعايتۋ، سونداي-اق بالالار مەن جاسوسپىرىمدەردىڭ الەۋمەتتىك باستامالارعا بەلسەندى قاتىسۋى ءۇشىن جاعداي جاساۋ.
