اتىراۋ وبلىسىنىڭ مامانداندىرىلعان اۋدانارالىق قىلمىستىق ىستەر جونىندەگى سوتىندا ءتورت ادامنان تۇراتىن وتباسىنىڭ ولىمىنە قاتىستى قىلمىستىق ءىس قارالىپ جاتىر، دەپ حابارلايدى "ادىرنا" ۇلتتىق پورتالى.
سوت وتىرىسى بارىسىندا ايىپتالۋشى سۇلتان سارسەماليەۆ قىلمىستان كەيىن قازاقستاننان شىعىپ كەتكەنىن ايتىپ، تۇركيا ارقىلى مەككەگە بارعانىن مالىمدەدى. ونىڭ ايتۋىنشا، ەلدەن كەتۋ تۋرالى شەشىمدى وقيعادان كەيىن قابىلداعان. سوتتا بەرگەن جاۋابىندا الدىمەن تۇركياعا، كەيىن مەككەگە بارعانىن جانە وندا شامامەن ون كۇن جالعىز بولعانىن جەتكىزدى.
سونداي-اق ايىپتالۋشى سول ۋاقىتتا وزىنە قول جۇمساۋ تۋرالى وي كەلگەنىن، ارەكەتى ءۇشىن قۇدايدان كەشىرىم سۇراۋدى قالاعانىن ايتتى. سونىمەن بىرگە ول جابىرلەنۋشىلەردى «سەبەپسىز ولتىرگەن جوقپىن» دەپ مالىمدەدى.
ايتا كەتەيىك، بۇل مالىمدەمەلەر ايىپتالۋشىنىڭ سوتتاعى ءوز تۇسىنىكتەمەسى بولىپ تابىلادى جانە ءىس بويىنشا تۇپكىلىكتى قۇقىقتىق باعانى سوتتىڭ شەشىمى ايقىندايدى.
قازىرگى ۋاقىتتا سوت پروتسەسى جالعاسىپ جاتىر.
