رەسەي پرەزيدەنتى ۆلاديمير پۋتين ورىستىڭ ۇلى كوشباسشىسىنىڭ «التىن ورداعا» باعىنعانىن ايتتى، دەپ حابارلايدى "ادىرنا" ءتىلشىسى.
رف پرەزيدەنتى پۋتين قوعامدىق پالاتانىڭ جاڭا سەگىزىنشى قۇرامىمەن كەزدەسۋ وتكىزدى. كەزدەسۋگە العاش رەت رەسەيدىڭ ۋكراينادان تارتىپ العان دحر، لپر، زاپوروجە جانە حەرسون وبلىستارىنىڭ وكىلدەرى قاتىستى.
جاڭا سەگىزىنشى قۇرامنىڭ كەزدەسۋى ارنايى 4 قاراشادا تويلاناتىن رەسەيدىڭ ۇلتتىق بىرلىك كۇنى قارساڭىندا ءوتتى.
پرەزيدەنت پۋتين وسى جيىندا تاريحقا كوز سالىپ، رەسەيدىڭ ۇلى قولباسشىسى سانالاتىن الەكساندر نەۆسكي ءومىر سۇرگەن كەزەڭگە توقتالىپ، كوشباسشىنىڭ «التىن ورداعا» باس يگەنىن ايتتى.
«الەكساندر نەۆسكي ءومىر سۇرگەن ءداۋىردى ەسكە الايىقشى. ول «التىن وردا» حاندارىنا بارىپ، باس ءيىپ، تىزەسىن بۇگىپ، انت ەتتى. قىزمەت ەتەمىن دەپ ءيىلدى. نەگە؟ ەڭ الدىمەن باتىستىڭ وتارلاۋىنان ساقتانۋدى ماقسات ەتتى. وردالىقتار وزدەرىن وتە وكتەم، قاتىگەز ۇستادى. بىراق ولار ءبىزدىڭ تىلىمىزگە، مادەنيەتىمىزگە، داستۇرىمىزگە تيمەدى. باتىس وتارلاۋشىلارى بولسا، بۇل قۇندىلىقتارىمىزدى جويار ەدى. وسى قۇندىلىقتاردى جۇلىپ الساڭ، وندا ۇلت تا بىرتىندەپ جويىلادى. مىنە، سول سەبەپتى دە ءبىز نەۆسكيدى ۇلى دەپ قۇرمەتتەيمىز، اۋليە سانايمىز. ونىڭ وسى تاڭداۋى ءۇشىن قۇرمەت تۇتامىز»، - دەدى پۋتين.
بۇل تۋرالى بەلگىلى ساياساتتانۋشى اسحات قاسەنعالي پىكىر ءبىلدىردى:
“قازاقتىڭ مەملەكەتى، تاريحى” بولماعان دەگەن رەسەي باسشىسى، وزىنە قارسى ادەمى كەيس تاۋىپ بەردى. نەۆسكيدىڭ ەسكەرتكىشى ءبىزدىڭ الماتىدا تۇر، ونىڭ سالىنۋىن بىزدىكىلەر دە، رەسەي ەلشىلىگى دە “زامانىندا قازاق جەرىنەن وتكەن” دەگەن نەگىزدە ءتۇسىندىردى. نە ءۇشىن وتكەن؟ ءپۋتيننىڭ ءوزى ايتقانداي ۇلى بابالارىمىزعا باس ءيىپ، تىزە بۇگۋ ءۇشىن،-دەدى ساياساتتانۋشى.
ەسكە سالايىق، 2014 جىلى رەسەي پرەزيدەنتى پۋتين «سەليگەر» جاستار فورۋمىندا «قازاقتاردا مەملەكەت بولماعان، مەملەكەتتى نۇرسۇلتان نازارباەۆ قۇردى» دەگەن ەدى. ونىڭ بۇل ءسوزى قوعامدا قىزۋ تالقىعا ءتۇستى.
