پرەمەر-مينيستر ولجاس بەكتەنوۆ رەسەي فەدەراتسياسىنىڭ ۇكىمەت باسشىسى ميحايل ميشۋستينمەن كەزدەسۋ وتكىزىپ، رەسەيلىك كومپانيالاردى ەلىمىزدەگى ينۆەستيتسيالىق جوبالارعا بەلسەندى اتسالىسۋعا شاقىردى، دەپ حابارلايدى "ادىرنا" ۇلتتىق پورتالى قازاقپاراتقا سىلتەپ.
كەزدەسۋ بارىسىندا بەكتەنوۆ قازاقستان مەن رەسەي اراسىنداعى ينۆەستيتسيالىق سەرىكتەستىكتىڭ تۇراقتى تۇردە دامىپ كەلە جاتقانىن اتاپ ءوتتى.
"سوڭعى 20 جىلدا رەسەيلىك ينۆەستورلار قازاقستان ەكونوميكاسىنا 25,2 ميلليارد دوللار كولەمىندە تىكەلەي ينۆەستيتسيا سالدى. قازاقستاندىق كومپانيالار دا وسى كەزەڭدە رەسەيگە 8,7 ميلليارد دوللار باعىتتادى. وتكەن جىلدىڭ 9 ايىندا رەسەيلىك ينۆەستيتسيالاردىڭ جالپى اعىنى 43,7%-عا ارتىپ، 2,8 ميلليارد دوللاردى قۇرادى", – دەدى ۇكىمەت باسشىسى.
قازاقستاندا قازىرگى ۋاقىتتا 23 مىڭنان استام رەسەيلىك ۇلەسى بار كومپانيا جۇمىس ىستەيدى. بۇل شەتەلدىك كاپيتالى بار كاسىپورىنداردىڭ 40%-عا جۋىعىن قۇرايدى.
بەكتەنوۆ قازاقستاننىڭ جاڭا وندىرىستەر قۇرۋعا مۇددەلى ەكەنىن، سوندىقتان رەسەيلىك بيزنەس وكىلدەرىن بىرلەسكەن ينۆەستيتسيالىق جوبالاردى ىسكە اسىرۋعا بەلسەندى قاتىسۋعا شاقىراتىنىن ايتتى.
ء"بىز ەكونوميكالىق ىنتىماقتاستىقتىڭ 2021-2025 جىلدارعا ارنالعان كەشەندى باعدارلاماسىنىڭ وڭ ناتيجەلەرىن كورىپ وتىرمىز. وسىعان بايلانىستى ءتيىستى مەملەكەتتىك ورگاندار كەلەسى جىلدارعا ارنالعان جاڭارتىلعان باعدارلامانى ازىرلەۋگە كىرىسۋى قاجەت دەپ سانايمىز", – دەدى پرەمەر-مينيستر.
ايتا كەتەيىك، بۇعان دەيىن قازاقستان مەن رەسەي اراسىنداعى تاۋار اينالىمىنىڭ 11 ايدا 24 ميلليارد دوللاردان اسقانى حابارلانعان.
