وزبەكستان پرەزيدەنتىنىڭ كومەكشىسى سايدا ميرزيوەۆا لاتىن گرافيكاسىنا نەگىزدەلگەن وزبەك ءالىپبيىن رەفورمالاۋ تۋرالى تالقىلاۋلار مەن داۋلاردى توقتاتىپ، وعان قاجەتتى وزگەرىستەر ەنگىزۋ قاجەتتىگىن مالىمدەدى. بۇل تۋرالى ول 11-12 جەلتوقساندا تاشكەنتتە ءوتىپ جاتقان جاديدشىلدىك قوزعالىسى مەن يدەيالارىنا ارنالعان كونفەرەنتسيادا ايتتى، دەپ حابارلايدى «ادىرنا» ۇلتتىق پورتالى.
ءىس-شارانىڭ اشىلۋىندا ءسوز العان سايدا ميرزيوەۆا جينالعانداردان تۇساۋكەسەردە بەرىلگەن «وزبەكستان» ءسوزىنىڭ قايسىسى دۇرىس جازىلعانىن سۇرادى. ول ەل، ۇلت اتاۋىنىڭ ءار ءتۇرلى ءارى قاتە جازىلاتىنىن، مۇنى تۇزەتۋ قاجەتتىگىن ايتتى.
«ويتكەنى ءبىز ءوز ۇلتىمىز، ماقتانىشىمىز، ەلىمىزدىڭ اتى تۋرالى ايتىپ وتىرمىز. شىنىندا دا، ءالىپبي رەفورماسى جاڭا تالقىلاۋلار، داۋلار مەن كۇتپەگەن قارجىلىق شىعىنداردى تۋدىرۋى مۇمكىن. بىراق، تاعى دا اتاپ وتەيىن، وتان، ۇلت اتىن دۇرىس جازۋعا كەلگەندە، مۇنداي پىكىرتالاستاردى، داۋلاردى توقتاتىپ، الىپبيگە بەلگىلى ءبىر وزگەرىستەر ەنگىزىپ، سول ارقىلى ءالىپبي ماسەلەسى تۇبەگەيلى نۇكتە قويۋ كەرەك دەپ ەسەپتەيمىن. »، - دەدى مەملەكەت باسشىسىنىڭ كومەكشىسى.
ونىڭ ايتۋىنشا، قازىر تاريحي قاتەلىكتەردى تۇزەتۋ ءۇشىن ساياسي ەرىك پەن جاعداي بار، سوندىقتان «جۇمىلا» ارەكەت ەتۋ قاجەت.
«بۇرىن كوپ قاتەلىك جىبەردىك، ەل دامۋىنا، ۇلتتىڭ دامۋىنا قىزمەت ەتكەندەردى ماسقارا ەتتىك، زيالى قاۋىمدى، مۇعالىمدەردى قۇلعا اينالدىردىق. مەنىڭ ويىمشا، بۇل تاريحي قاتەلىكتەر ۇزاق ۋاقىتقا اسەر ەتەدى. بىراق ءبىر نارسە انىق: بۇگىندە بۇل قاتەلىكتەردى تۇزەتەتىن ساياسي ەرىك تە، مۇمكىندىك تە، جاعداي دا بار. بۇل مۇمكىندىكتى جىبەرىپ الساق، ورتاق يدەيالاردىڭ توڭىرەگىندە بىرىكپەسەك، ءبىر سوزبەن ايتقاندا، ءبىر كۇش، ءبىر جۇدىرىق بولىپ ارەكەت ەتپەسەك، ءبىزدى بولاشاق كەشىرمەيدى»، - دەدى سايدا ميرزيوەۆا.
كونفەرەنتسيا ۇلتتىق باق-تى قولداۋ جانە دامىتۋ قوعامدىق قورىمەن، قۋعىن-سۇرگىن قۇرباندارىن ەسكە الۋ مەملەكەتتىك مۇراجايىمەن، عىلىم اكادەمياسىمەن جانە تۇركى مەملەكەتتەرى ۇيىمىمەن بىرلەسىپ وتۋدە. وعان اقش، جاپونيا، تۇركيا، قىرعىزستان، قازاقستان جانە ءازىربايجاننىڭ زەرتتەۋشىلەرى مەن عالىمدارى قاتىسادى.
2020 جىلدىڭ قازان ايىندا پرەزيدەنت شاۆكات ميرزيوەۆ ەلدەگى وزبەك ءتىلىن دامىتۋ جانە ءتىل ساياساتىن جەتىلدىرۋ تۋرالى جارلىققا قول قويدى. قۇجاتتا ۇكىمەتكە لاتىن گرافيكاسىنا نەگىزدەلگەن الىپبيگە تۇپكىلىكتى جانە تولىق كوشۋدى قامتاماسىز ەتۋ ءۇشىن جۇمىس توبىن قۇرۋ تاپسىرىلدى.
كەيبىر ارىپتەردى وزگەرتۋدى جانە ءالىپبيدى جەڭىلدەتۋدى قامتيتىن لاتىن گرافيكاسىنداعى جاڭا وزبەك ءالىپبيىنىڭ جوباسى 2018 جانە 2021 جىلدارى كەيبىر وزگەرىستەرمەن تالقىلاۋعا جاريالانسا، 2023 جىلى ونىڭ بالامالى نۇسقاسى تالقىلاندى.
«ادىرنا» ۇلتتىق پورتالى
