دەنساۋلىق ساقتاۋ ءمينيسترى اجار عينيات قازاقستاندا قىزىلشامەن اۋىرىپ جاتقان 30 بالانىڭ جاعدايى اۋىر ەكەنىن ايتتى، دەپ حابارلايدى «ادىرنا» ۇلتتىق پورتالى.
دەنساۋلىق ساقتاۋ مينيسترلىگىنىڭ مالىمەتى بويىنشا، قازاقستاندا قىزىلشامەن 17 مىڭنان استام جاعداي تىركەلدى، 82 پايىزدان كوبى بالالاردا، ونىڭ ىشىندە 83 پايىزى ۆاكتسيناتسيالانباعان بالالار. بارلىق وبلىستاردا قىزىلشا اۋرۋى تىركەلگەنى اتاپ ءوتىلدى. دەڭگەيلەردىڭ جوعارىلاۋى بايقالادى:
شىمكەنتتە – 3 مىڭنان استام;
الماتى جانە جامبىل وبلىسىندا – 2 مىڭنان استام جاعداي;
الماتى، ماڭعىستاۋ، اقتوبە، قىزىلوردا، اتىراۋ وبلىستارىندا – مىڭنان استام جاعداي.
دەنساۋلىق ساقتاۋ ءمينيسترى بالالاردىڭ ۇيىمداسقان توپتارعا جينالۋىنا بايلانىستى 2023 جىلدىڭ قىركۇيەگىنەن باستاپ اۋرۋشاڭدىقتىڭ كۇرت ءوسۋى بايقالعانىن حابارلادى.
«ناتيجەسىندە، اۋرۋشاڭدىق ەكى ەسەگە ءوستى. قاراشا ايىندا قىزىلشامەن اۋىراتىن 6 مىڭنان استام جاعداي تىركەلدى. بۇگىندە ەلىمىزدە قىزىلشامەن اۋىراتىن ناۋقاستارعا ارنالعان 3,5 مىڭنان استام توسەك-ورىن ورنالاستىرىلدى. 2375 بالا ستاتسيونارلىق ەمدەلۋدە، توسەك-ورىن 60 پايىزدى، توسەك رەزەرۆى 1093 قۇرايدى.
جامبىل وبلىسىندا - 92 پايىز، الماتىدا - 88 پايىز، تۇركىستان وبلىسىندا - 81 پايىز، شىمكەنتتە - 79 پايىز توسەك-ورىننىڭ جوعارى قامتىلۋى بايقالادى. اۋرۋحاناعا جاتقىزىلعانداردىڭ ىشىندە 30 بالا اۋىر جاعدايدا رەانيماتسيادا، ونىڭ ىشىندە ءبىر جاسقا دەيىن - 15 بالا. ءولىم تىركەلگەن جوق»، - دەدى مينيستر ۇكىمەت وتىرىسىندا.
«ادىرنا» ۇلتتىق پورتالى
