بۇگىن — تاەكۆوندودان قارا بەلبەۋ التىنشى دان يەگەرى، قازاقستان رەسپۋبليكاسى تاەكۆوندو فەدەراتسياسىنىڭ نەگىزىن قالاۋشى، حالىقارالىق دارەجەدەگى جاتتىقتىرۋشى مۇستافا وزتۇرىكتىڭ (1954-1995) تۋعان كۇنى.
اتاقتى سپورتشى 1954 جىلى قاراشانىڭ 23-ءى كۇنى دۇنيەگە كەلدى.
ىستامبۇلدا تۋعان مۇستافا وزتۇرىك – قازاق جانە تۇرىك تاەكۆوندوسىنىڭ نەگىزىن قالاۋشىلاردىڭ ءبىرى بولىپ سانالادى. ول – 1930 جىلدارى اتالارى قيىن-قىستاۋ كەزدە قىتايدىڭ التايىنا كەتىپ، ول جەردەن ءۇندىستان مەن پاكىستان ارقىلى تۇركياعا وتكەن قازاق دياسپوراسىنىڭ وكىلى.
وزتۇرىك 1975-1980 جىلدارى تايبەيدەگى حالىقارالىق ساياسات ۋنيۆەرسيتەتىندە وقىپ، جۋرناليست ماماندىعى بويىنشا ديپلوم العان. رەسمي ءومىربايانىنا سايكەس، وسى ەلدە تاەكۆوندو سپورتىنا ىنتاسى اۋىپ، شىعىس جەكپە-جەگىن ۇيرەنەدى دە، شەبەرلىگىن 7-كىپقا (سارى-جاسىل بەلبەۋ) دەيىن جەتكىزەدى. ەڭ جوعارى شەگى 10-كىپ (اق بەلبەۋ) دەپ سانالاتىن تاەكۆوندودا 7-كىپ يەلەرى عانا «ساحيۋننيم»، ياعني شەبەر اتالادى. وقۋ بىتىرگەن سوڭ وزتۇرىك ميۋنحەندە اسكەريلەر مەن پوليتسەيلەرگە شىعىس جەكپە-جەگىنەن جاتتىقتىرۋشى بولىپ جۇمىسقا تۇرادى. كەيىن گەرمانياداعى العاشقى تاەكۆوندو مەكتەپتەرىنىڭ ءبىرىن اشادى. 1980 جىلداردىڭ باسىندا ستامبۋلدا دا مۇستافا وزتۇرىك مەكتەبى اشىلىپ، تۇرىك شاكىرتتەرى الەمدىك جارىستاردا جۇلدە الا باستايدى.
1990 جىلى كوكتەمدە مۇستافا وزتۇرىك قازاقستاننىڭ بيلىك وكىلدەرىنىڭ شاقىرتۋىمەن تاريحي اتاجۇرتىنا العاش كەلەدى. كۇزدە وزتۇرىك قازاق جاستارىن تاەكۆوندوعا باۋلۋ ءۇشىن قازاقستانعا ءبىرجولا ورنىعىپ، 1991 جىلى قازاقستان تاەكۆوندو فەدەراتسياسىن قۇرادى. 1992 جىلى قازاقستان حالىقارالىق تاەكۆوندو فەدەراتسياسىنىڭ (WTA) مۇشەسى بولادى. وسى جىلى مۇستافا وزتۇرىك قازاقستان ازاماتتىعىن الادى. ونىڭ شاكىرتتەرى العاش رەت 1992 جىلى تۇركياداعى حالىقارالىق جارىسقا بارىپ، ەكى التىنمەن ورالادى.
1995 جىلى مۇستافا وزتۇرىك جاتتىقتىرعان قازاقستاندىق سپورتشىلار اسكەريلەر اراسىنداعى تاەكۆوندودان الەم چەمپيوناتىندا وڭتۇستىككورەيالىقتاردى عانا العا جىبەرىپ، كوماندالىق ەسەپتە ەكىنشى ورىن الادى.
قازاقستان قالالارىنىڭ كوپتەگەن كوشەلەرىنە مۇستافا وزتۇرىك ەسىمى بەرىلگەن. الماتى وبلىسى تالعار اۋدانىنىڭ بەساعاش اۋىلىندا سپورتشىعا ەسكەرتكىش قويىلعان. كوپتەگەن تاەكۆوندو مەكتەپتەرى مۇستافا وزتۇرىك ەسىمىمەن اتالادى.
