Bügın — taekvondodan qara belbeu altynşy dan iegerı, Qazaqstan Respublikasy taekvondo federasiiasynyŋ negızın qalauşy, halyqaralyq därejedegı jattyqtyruşy Mūstafa ÖZTÜRIKTIŊ (1954-1995) tuǧan künı.
Ataqty sportşy 1954 jyly qaraşanyŋ 23-ı künı düniege keldı.
Ystambūlda tuǧan Mūstafa Öztürık – qazaq jäne türık taekvondosynyŋ negızın qalauşylardyŋ bırı bolyp sanalady. Ol – 1930 jyldary atalary qiyn-qystau kezde Qytaidyŋ Altaiyna ketıp, ol jerden Ündıstan men Päkıstan arqyly Türkiiaǧa ötken qazaq diasporasynyŋ ökılı.
Öztürık 1975-1980 jyldary Taibeidegı Halyqaralyq saiasat universitetınde oqyp, jurnalist mamandyǧy boiynşa diplom alǧan. Resmi ömırbaianyna säikes, osy elde taekvondo sportyna yntasy auyp, şyǧys jekpe-jegın üirenedı de, şeberlıgın 7-kypqa (sary-jasyl belbeu) deiın jetkızedı. Eŋ joǧary şegı 10-kyp (aq belbeu) dep sanalatyn taekvondoda 7-kyp ielerı ǧana «sahiunnim», iaǧni şeber atalady. Oqu bıtırgen soŋ Öztürık Miunhende äskeriler men poliseilerge şyǧys jekpe-jegınen jattyqtyruşy bolyp jūmysqa tūrady. Keiın Germaniiadaǧy alǧaşqy taekvondo mektepterınıŋ bırın aşady. 1980 jyldardyŋ basynda Stambulda da Mūstafa Öztürık mektebı aşylyp, türık şäkırtterı älemdık jarystarda jülde ala bastaidy.
1990 jyly köktemde Mūstafa Öztürık Qazaqstannyŋ bilık ökılderınıŋ şaqyrtuymen tarihi atajūrtyna alǧaş keledı. Küzde Öztürık qazaq jastaryn taekvondoǧa baulu üşın Qazaqstanǧa bırjola ornyǧyp, 1991 jyly Qazaqstan taekvondo federasiiasyn qūrady. 1992 jyly Qazaqstan Halyqaralyq taekvondo federasiiasynyŋ (WTA) müşesı bolady. Osy jyly Mūstafa Öztürık Qazaqstan azamattyǧyn alady. Onyŋ şäkırtterı alǧaş ret 1992 jyly Türkiiadaǧy halyqaralyq jarysqa baryp, ekı altynmen oralady.
1995 jyly Mūstafa Öztürık jattyqtyrǧan qazaqstandyq sportşylar äskeriler arasyndaǧy taekvondodan älem chempionatynda oŋtüstıkkoreialyqtardy ǧana alǧa jıberıp, komandalyq esepte ekınşı oryn alady.
Qazaqstan qalalarynyŋ köptegen köşelerıne Mūstafa Öztürık esımı berılgen. Almaty oblysy Talǧar audanynyŋ Besaǧaş auylynda sportşyǧa eskertkış qoiylǧan. Köptegen taekvondo mektepterı Mūstafa Öztürık esımımen atalady.
Ūqsas jaŋalyqtar
