كوكپار دەسە دەلەبەسى قوزبايتىن قازاق كەمدە -كەم. ايتىس پەن كوكپار قازاقتىڭ جانى. كوكتەم باستالا اۋىلدان باستاپ رەسپۋبليكا كولەمىندە دۇركىرەپ وتەتىن كوكپار تويى كۇزگە دەيىن تارقامايدى. قازاقتىڭ وسى ءبىر قانىنا بىتكەن اردا ونەرى جاقىندا ەۋروپا تورىندە دۇركىرەدى.
قۇرامىندا ەلىمىزدىڭ 5 بىردەي جوعارى وقۋ ورىندارىنىڭ ستۋدەنتتەرىنەن قۇرالعان ۇلتتىق جاستار قۇرامامىز فرانتسيادا ونەر كورسەتىپ قايتتى. قىسقاشا عانا، جكل دەپ اتالاتىن جاس كوكپارشىلاردىڭ ونەرىنە كارى قۇرلىق قاتتى تامسانعانى سونشا، بولاشاقتا انگليا مەن امەريكادا دا ونەر كورسەتپەك. كوكپارشىلارىمىزدى الماتى اۋەجايىنان قازاق سپورت جانە تۋريزم اكادەمياسىنىڭ ءبىرىنشى پرورەكتورى ەسقاليەۆ مۇحتار باستاعان قولداۋشىلار كۇتىپ الىپ، سىي-سياپاتتارىن تاپسىردى. سىزدەرگە جكل-دى قىسقاشا تانىستىرا كەتەيىك.
2017 جىلى الماتى قالاسىنىڭ جوعارى وقۋ ورىندارىنىڭ بەس رەكتورى قر تۇڭعىش پرەزيدەنتىنىڭ قولداۋىمەن ۇلتتىق جاستار سپورت ليگاسىنىڭ اياسىندا كوكپار كومانداسىن قۇرۋعا باستاما كوتەردى.
سول باستامانىڭ اياسىندا جاستار كوكپار ليگاسى قۇرىلىپ، الماتىنىڭ 5 جوو اتاپ ايتقاندا،
ءال-فارابي اتىنداعى قازاق ۇلتتىق مەملەكەتتىك ۋنيۆەرسيتەتى،
قازاق سپورت جانە تۋريزم اكادەمياسى،
قازاق ۇلتتىق اگرارلىق ۋنيۆەرسيتەتى،
قازاق ۇلتتىق پەداگوگيكالىق ۋنيۆەرسيتەتى،
الماتى ەنەرگەتيكا جانە بايلانىس ۋنيۆەرسيتەتى وسى ليگانىڭ تۋى استىندا سىنعا تۇسۋدە.
"جكل ويىندارى قازاقستان تاريحىندا تۇڭعىش رەت ءال-فارابي اتىنداعى قازۇۋ-ءنىڭ ستاديونىنىڭ فۋتبول الاڭدارىندا، سونداي-اق قازاق سپورت جانە تۋريزم اكادەمياسىنىڭ ستاديونىندا وتەدى. ءتۋرنيردى الەمگە تانىمال «Setanta-Kazakhstan» سپورت ارناسى جۇزەگە اسىرادى.
سوڭعى جىلدارى كوكپار ستۋدەنتتەر سپورتى اراسىندا قاتتى تانىمالدىلىققا يە بولىپ، بولاشاقتا ازيا ستۋدەنتتىك ويىندارى قاتارىنا ەنگىزىلمەك.
ليگانىڭ مۇنداي قىزمەتى «رۋحاني جانعىرۋ» باعدارلاماسىنا جانە ەلباسىنىڭ«ۇلى دالانىڭ جەتى قىرى» ماقالاسىنا سايكەس كەلەدى.
سونىمەن قاتار، 2019 جىلى مەملەكەت باسشىسى جاستار جىلى دەپ جاريالاندى. كوكپار- جاڭا دا كونە، ءبىلىم مەن بىلىكتىڭ كەرەمەت كورىنىسى.
بۇل سپورت تەك جاستاردى بىرىكتىرىپ قانا قويماي، سونىمەن قاتار قازاقستاننىڭ حالىقارالىق ءيميدجىن قالىپتاستىرۋعا دا زور ەڭبەك ەتەدى.
جكل جاقىندا عانا فرانتسيانىڭ فونتەنبلوو قالاسىندا كوشپەندىلەردىڭ وسى ءبىر كەرەمەت ويىنىن ناسيحاتتاپ قايتتى. بولاشاقتا وسى ۇلتتىق ويىندى الەم بويىنشا تاراتپاقشىمىز" دەيدى جكل كەڭەسىنىڭ توراعاسى دانيار داۋكەي.
"ادىرنا" ۇلتتىق پورتالى
