Kókpar dese delebesi qozbaıtyn qazaq kemde -kem. Aıtys pen kókpar qazaqtyń jany. Kóktem bastala aýyldan bastap respýblıka kóleminde dúrkirep ótetin kókpar toıy kúzge deıin tarqamaıdy. Qazaqtyń osy bir qanyna bitken arda óneri jaqynda Eýropa tórinde dúrkiredi.
Quramynda elimizdiń 5 birdeı joǵary oqý oryndarynyń stýdentterinen quralǵan ulttyq jastar quramamyz Franııada óner kórsetip qaıtty. Qysqasha ǵana, JKL dep atalatyn jas kókparshylardyń ónerine kári qurlyq qatty tamsanǵany sonsha, bolashaqta Anglııa men Amerıkada da óner kórsetpek. Kókparshylarymyzdy Almaty áýejaıynan Qazaq sport jáne týrızm akademııasynyń birinshi prorektory Esqalıev Muhtar bastaǵan qoldaýshylar kútip alyp, syı-sııapattaryn tapsyrdy. Sizderge JKL-dy qysqasha tanystyra keteıik.
2017 jyly Almaty qalasynyń joǵary oqý oryndarynyń bes rektory QR Tuńǵysh Prezıdentiniń qoldaýymen Ulttyq Jastar Sport Lıgasynyń aıasynda Kókpar komandasyn qurýǵa bastama kóterdi.
Sol bastamanyń aıasynda Jastar Kókpar Lıgasy qurylyp, Almatynyń 5 JOO atap aıtqanda,
Ál-Farabı atyndaǵy Qazaq ulttyq memlekettik ýnıversıteti,
Qazaq sport jáne týrızm akademııasy,
Qazaq ulttyq agrarlyq ýnıversıteti,
Qazaq ulttyq pedagogıkalyq ýnıversıteti,
Almaty energetıka jáne baılanys ýnıversıteti osy Lıganyń týy astynda synǵa túsýde.
"JKL oıyndary Qazaqstan tarıhynda tuńǵysh ret Ál-Farabı atyndaǵy QazUÝ-niń stadıonynyń fýtbol alańdarynda, sondaı-aq Qazaq sport jáne týrızm akademııasynyń stadıonynda ótedi. Týrnırdi álemge tanymal «Setanta-Kazakhstan» sport arnasy júzege asyrady.
Sońǵy jyldary kókpar stýdentter sporty arasynda qatty tanymaldylyqqa ıe bolyp, bolashaqta Azııa stýdenttik oıyndary qataryna engizilmek.
Lıganyń mundaı qyzmeti «Rýhanı Janǵyrý» baǵdarlamasyna jáne Elbasynyń«Uly dalanyń jeti qyry» maqalasyna sáıkes keledi.
Sonymen qatar, 2019 jyly Memleket basshysy jastar jyly dep jarııalandy. Kókpar- jańa da kóne, bilim men biliktiń keremet kórinisi.
Bul sport tek jastardy biriktirip qana qoımaı, sonymen qatar QAZAQSTANNYŃ halyqaralyq ımıdjin qalyptastyrýǵa da zor eńbek etedi.
JKL jaqynda ǵana Franııanyń Fontenbloo qalasynda kóshpendilerdiń osy bir keremet oıynyn nasıhattap qaıtty. Bolashaqta osy ulttyq oıyndy álem boıynsha taratpaqshymyz" deıdi JKL keńesiniń tóraǵasy Danııar Dáýkeı.
"Adyrna" ulttyq portaly