بۇگىن - پرەزيدەنت سايلاۋىنا 1 جىل تولدى، دەپ حابارلايدى “ادىرنا” ۇلتتىق پورتالى.
بىلتىر 20 قاراشادا ەلىمىزدە كەزەكتەن تىس پرەزيدەنت سايلاۋى ءوتىپ، قاسىم-جومارت توقاەۆ كونستيتۋتسياعا ەنگىزىلگەن وزگەرتۋلەر بويىنشا 7 جىلدىق ءبىر مەرزىمگە سايلانعان بولاتىن.
رەسپۋبليكاداعى بۇكىل سايلاۋشىلاردىڭ 69 پايىزى نەمەسە 8 ملن 300 مىڭ 46 ادام بەلسەندى قاتىسىپ، ءوز تاڭداۋىن جاساعان ەدى.
ايتا كەتەيىك، 2022 جىلدىڭ 1 قىركۇيەگىندە «ادىلەتتى مەملەكەت. ءبىرتۇتاس ۇلت. بەرەكەلى قوعام» اتتى قازاقستان حالقىنا جولداۋىن ارناعان مەملەكەت باسشىسى قاسىم-جومارت توقاەۆ كەزەكتەن تىس پرەزيدەنت سايلاۋىن وتكىزۋدى ۇسىنعان بولاتىن. كەيىن سول جىلدىڭ 20 قاراشاسى سايلاۋ ءوتتى.
بارلىق وڭىردە 10 033 سايلاۋ ۋچاسكەسى جۇمىس ىستەدى. ال شەت مەملەكەتتەردەگى قازاقستان وكىلدىكتەرى جانىندا 68 ۋچاسكە قۇرىلدى. ناقتىلانعان سايلاۋشىلار تىزىمدەرىنە ساي، جالپى سايلاۋشىلار سانى 11 ملن 953 مىڭ 465 ادامدى قۇرادى.
ونىڭ 8 ملن 300 مىڭ 46 ادامى نەمەسە 69,44 پايىزى داۋىس بەرۋگە ارنالعان بيۋللەتەندەردى الدى.
داۋىس بەرۋ ناتيجەسىندە قاسىم-جومارت توقاەۆقا 6 ملن 456 مىڭ 392 سايلاۋشى نەمەسە ولاردىڭ 81,31 پايىزى، جيگۋلي دايراباەۆقا 271 641 نەمەسە 3,42 پايىزى، قاراقات ابدەنگە206 مىڭ نەمەسە 2,6 پايىزى، مەيرام قاجىكەنگە 200 907 نەمەسە 2,53 پايىزى، نۇرلان اۋەسباەۆقا 176 116 نەمەسە 2,22 پايىزى جانە سالتانات تۇرسىنبەكوۆاعا 168 731 نەمەسە 2,12 پايىز داۋىس بەردى.
بيۋللەتەنگە العاش رەت ەنگىزىلگەن «بارىنە قارسىمىن» باعانىن 460 484 نەمەسە 5,8 پايىز سايلاۋشى تاڭدادى.
داۋىس بەرۋ كۇنى قر پرەزيدەنتتىگىنە كانديداتتاردىڭ 11 مىڭنان اسا سەنىم بىلدىرگەن ادامدارى، شەتەلدىك حالىقارالىق ۇيىمداردىڭ 641 بايقاۋشىسى، ساياسي پارتيالاردىڭ 15,5 مىڭنان اسا بايقاۋشىسى، قوعامدىق بىرلەستىكتەردەن 30 مىڭنان اسا بايقاۋشى سايلاۋدى باقىلاۋدى جۇرگىزدى.
سايلاۋ ۋچاسكەلەرىندە 1225 قازاقستاندىق باق وكىلدەرى، 23 ەلدىڭ 41 شەتەلدىك باق-تىڭ اككرەديتتەلگەن جۋرناليستەرى اقپارات تاراتتى. ولاردىڭ قىزمەتى سايلاۋشىلار مەن سايلاۋ پروتسەسىنە قاتىسۋشىلاردىڭ قۇقىقتارىن قامتاماسىز ەتۋگە وڭ ىقپال ەتتى.
22 قاراشادا ورتالىق سايلاۋ كوميسسياسى قاسىم-جومارت توقاەۆتى پرەزيدەنت رەتىندە تىركەدى. ال قاسىم-جومارت كەمەلۇلى پرەزيدەنت رەتىندە 26 قاراشادا انت بەردى.
