اقش-تا ۆەنەسۋەلا پرەزيدەنتى نيكولاس مادۋروعا جانە ونىڭ جۇبايى سيليا فلورەسكە رەسمي تۇردە ايىپ تاعىلدى. بۇل تۋرالى اقش-تىڭ باس پروكۋرورى پەم بوندي مالىمدەدى، دەپ حابارلايدى "ادىرنا" ۇلتتىق پورتالى.
ونىڭ ايتۋىنشا، ايىپتاۋ اكتىسى نيۋ-يورك شتاتىنىڭ وڭتۇستىك وكرۋگىندە تىركەلگەن. نيكولاس مادۋرو ناركوتەرروريزم ماقساتىنداعى ءسوز بايلاسۋ، كوكاين تاسىمالداۋدى ۇيىمداستىرۋ، پۋلەمەتتەر مەن جويقىن قۇرىلعىلاردى زاڭسىز يەلەنۋ، اقش-قا قارسى قاستاندىق جاساۋ باپتارى بويىنشا ايىپتالىپ وتىر.
پەم بوندي الەۋمەتتىك جەلىدەگى مالىمدەمەسىندە ايىپتالۋشىلاردىڭ جاقىن ارادا اقش اۋماعىندا امەريكالىق سوت الدىندا جاۋاپ بەرەتىنىن اتاپ ءوتتى. ول پرەزيدەنت دونالد ترامپقا جانە ارنايى وپەراتسيا جۇرگىزگەن اسكەري قىزمەتكەرلەرگە العىس ءبىلدىردى.
ABC News دەرەگىنشە، نيكولاس مادۋرو ۇشاقپەن نيۋ-يورككە جەتكىزىلۋدە، الايدا ونىڭ ناقتى قاي جەردە قاماۋدا ۇستالىپ جاتقانى ازىرگە ناقتىلانباعان. امەريكالىق باق-تىڭ حابارلاۋىنشا، مادۋرونى ۇستاۋ وپەراتسياسىن اقش ارمياسىنىڭ Delta Force ارنايى جاساعى جۇزەگە اسىرعان.
ۆەنەسۋەلانىڭ ۆيتسە-پرەزيدەنتى دەلسي رودريگەس مەملەكەتتىك تەلەارنادا سويلەگەن سوزىندە مادۋرو مەن ونىڭ جۇبايىنىڭ ناقتى قايدا ەكەنىن بىلمەيتىنىن ايتتى.
بۇعان دەيىن دونالد ترامپ ۆەنەسۋەلا پرەزيدەنتى مەن ونىڭ جۇبايىنىڭ ۇستالىپ، ەلدەن اكەتىلگەنىن مالىمدەگەن ەدى.
