جەتىسۋدا 14 جاستاعى مەكتەپ وقۋشىسىن زورلادى دەگەن كۇدىككە ىلىنگەن 35 جاستاعى ازامات ۇستالعان بولاتىن. "كامەلەتكە تولماعان ءجاسوسپىرىمدى زورلاۋ" ءىسىنىڭ ءمان-جايىن انىقتاۋ ماقساتىندا باق وكىلدەرى عاني بەيسەمباەۆقا ءتۇرلى ساۋال جولدادى، دەپ حابارلايدى "ادىرنا" ءتىلشىسى Qaz365.kz-كە سىلتەمە جاساپ.
جەتىسۋ وبلىسى سارقاند اۋدانىنىڭ پوليتسيا قىزمەتكەرلەرى ەر ادامدى ۇستاعان. ول سارقاند قالاسىنداعى مەكتەپتەردىڭ بىرىندە 14 جاستاعى وقۋشىنى زورلادى دەگەن كۇدىككە ءىلىنىپ وتىر.
باق بەتتەرىندە كۇدىكتى 10 جىل بويى سارقاند قالاسىنداعى مەكتەپتەردىڭ بىرىندە مۇعالىم بولىپ جۇمىس ىستەگەنى ايتىلادى. سونداي-اق ول زورلانعان بالانىڭ اپكەسىنىڭ كۇيەۋى بولعانى حابارلانعان.
جاعا ۇستاتارلىق قىلمىس سارقاند قالاسىنداعى قوناقۇيلەردىڭ بىرىندە بولعان. بولمەدەگى كومەك سۇراپ، ايقايلاعان داۋىسقا قوناقۇيدىڭ مەڭگەرۋشىسى كومەككە كەلگەن. ول بولمەنى اشقاننان سوڭ بالانى بوساتىپ، پوليتسيا شاقىرىپتى. بىراق قىلمىسكەر ءىزىن سۋىتىپ ۇلگەرگەن. ال كۇدىكتى بولسا ەكى كۇن بويى تاۋدا جاسىرىنىپ جاتقان. ول پوليتسيا قىزمەتكەرلەرىنە توپولەۆكا اۋىلىنان 10 شاقىرىم جەردە تاۋلاردىڭ اراسىنان ۇستالعان.
جۋرناليست سامال قابىشەۆانىڭ جازباسىنا سايكەس، 7 قازان كۇنى ءجاسوسپىرىمدى زورلاعان 35 جاستاعى كۇدىكتى 10 جىل بويى سارقان قالاسىنداعى مەكتەپتەردىڭ بىرىندە ماتەماتيكا پانىنەن مۇعالىم بولىپ جۇمىس ىستەگەن. زورلانعان ءوزىنىڭ تۋعان بالدىزى ءارى وقۋشىسى كورىنەدى.
ماجىلىستەن سوڭ وسى وقيعا جونىندە وقۋ-اعارتۋ ءمينيسترى عاني بەيسەمباەۆقا سۇراق قويىلدى. الايدا مينيستر بۇل وقيعانى نە راستامادى، نە تەرىستەمەدى. تەك تەرگەۋگە سىلتەپ تۇرىپ الدى.
«جالپى كەز كەلگەن ونداي ماسەلە بولسا، ازاماتتار قۇزىرلى ورگاندارعا جۇگىنەتىنىن بىلەسىز. ىشكى ىستەر مينيسترلىگى كەز كەلگەن زورلاۋ فاكتىسىنە ارالاسىپ، ءوزىنىڭ قۇقىقتىق باعاسىن بەرۋى كەرەك. سوندىقتان، كەز كەلگەن جاعداي تەرگەۋ امالدارىندا شەشىلەدى. بىراق بالالارعا قاتىستى ماسەلەلەردى وقۋ-اعارتۋ مينيسترلىگىنە قاراستى بالا قۇقىقتارىن قورعاۋ كوميتەتى باقىلاۋدا ۇستايدى. سەبەبى ءبىزدىڭ ەلىمىزدەگى بالالاردىڭ قۇقىقتارى بۇزىلماۋىن قاداعالاپ، جۇيەلى تۇردە باقىلاۋدا ۇستايدى»، – دەيدى ول.
ونىڭ ايتۋىنشا، بيىل تامىز ايىنىڭ سوڭىندا ۇكىمەتتىڭ تاپسىرماسىمەن بالالاردىڭ قۇقىعىن قورعاۋعا قاتىستى كەشەندى جوسپار قابىلدانعان ەكەن. مينيستر اتا-انالارعا:
«جالپى مۇنداي ماسەلەدە تەرگەۋ امالدارى جۇرگىزىلەتىنىن بىلەسىز. ويتكەنى تەرگەۋ امالدارىنان كەيىن ءتيىستى قۇقىق قورعاۋ ورگاندارى ءوزىنىڭ شەشىمىن ايتۋى ءتيىس. جالپى قازاقستان بويىنشا مۇنداي كەلەڭسىز جايتتارعا جول بەرمەس ماقساتىندا كەشەندى جوسپار بار. ول قىركۇيەكتەن باستاپ ىسكە اسىرىلىپ جاتىر. كەشەندى جوسپار ءوز ناتيجەسىن بەرەدى»، – دەپ ايتتى عاني بەيسەمباەۆ.
