Mádenıet jáne aqparat mınıstri Aıda Balaevanyń aıtýynsha, Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa turmystyq zorlyq-zombylyqpen kúresýdiń keshendi josparyn ázirleýge kiristi. Bul týraly «Adyrna» ulttyq portaly habarlaıdy.
«Ózderińiz biletindeı, el Prezıdenti: «Bizdiń qoǵamdaǵy eń basty ıdeologııa — bul zań men tártiptiń ústemdigi degen bolatyn. Bul birinshi kezekte qoǵamnyń qarym-qatynasyna ǵana emes, turmystyq máselelerge de qatysty aıtylǵan qaǵıda. Ásirese, qazir biz úshin turmystyq zorlyq-zombylyq máseleleri aldyńǵy orynda tur. Mundaı qylmystar úshin jaýapkershilik 2023 jyldyń 1 shildesinen edáýir kúsheıtilgen bolatyn. Sodan beri jaýapqa tartylǵan agressorlar sany 2 ese kóbeıgen. Dálirek aıtqanda, osy jyldyń II-toqsanynda 7 myń adam jaýapqa tartylsa, III-toqsanda olardyń sany 27 myń adamǵa jetken. Odan basqa taǵy 60 myń quqyq buzýshy ákimshilik jaýapkershilikke tartyldy. Olarǵa qatysty 70 myń eskertý jasaldy. Quqyq buzýshylardyń minez-qulqyn túzetý úshin sot arqyly 12 myń talap qoıyldy», — dep Facebook jelisine beıneúndeý jarııalady.
Mınıstrdiń málimetinshe, qabyldanǵan sharalardyń nátıjesi, 10 aıda otbasylyq-turmystyq quqyq buzýshylyqtar týraly habarlamalardy tirkeý 20 paıyzǵa, onyń ishinde qylmystyq quqyq buzýshylyqtar 4,2 paıyzǵa, aýyr qylmystar 12 paıyzǵa tómendegen.
«Ókinishke qaraı, keıingi jaǵdaılar bul máseleniń áli de kún tártibinen túspegenin jáne ózekti ekenin kórsetip tur. Basty sebep — azamattardyń zańdy quqyǵyn qurmettemeý. Osydan týyndaıtyn sananyń buzylýy, jalpy quqyqtyq negılızm qazirgi qoǵamǵa tán ekenin kórsetip otyr. Biz ata-ana retinde balalarǵa úıde bolsyn, syrtta bolsyn keleńsiz qubylystarmen kúresý mádenıetin qalyptastyrýymyz qajet. Qoǵam zań buzýshylyqqa, zorlyq-zombylyq pen dórekilikke tózbeýi tıis. Onyń ishinde turmystyq zorlyq-zombylyqtan, buzaqylyqtan, dórekilikten jáne vandalızmnen múldem bas tartý atmosferasyn qalyptastyrýymyz mańyzdy. Barsha adam balasyna degen qurmet, er-azamattardyń áıel men qyzdarǵa degen syılastyǵyn bala kezden boıyna sińirý qajet. Ózimiz ben aınaladaǵy adamdardyń taǵdyry men ómiri bizge baılanysty ekenin árqashan este ustaýymyz kerek. Dál qazir Prezıdent janyndaǵy Áıelder jáne otbasy saıasaty jónindegi ulttyq komıssııa turmystyq zorlyq-zombylyqpen kúresýdiń keshendi josparyn ázirleýge kiristi. Sondyqtan sarapshylardy, azamattyq sektor ókilderin belsendi bolýǵa, tıisti usynystardy joldaýǵa shaqyramyn», — dedi Aıda Balaeva.
«Adyrna» ulttyq portaly
