كەيدە وسى ينتەرنەتتەگى "قوسانوۆ - بويكوت" دەگەن ايعاي - شۋدىڭ ءبارى دالباسا نارسە اۋ دەپ ويلايمىن.
الەۋمەتتىك جەلىدە، مىسالى وسى فەيسبۋكتە ارى كەتسە 150 مىڭ ادام، يۋتۋبتە ساياسي روليكتەر كورىلىمى بويىنشا 1- 2 ملن،
ينستاگرامم، ۆك، ۆاتساپ ءبارىن قوسساق سول يۋتۋب سانىنداي بولادى. ال ەلىمىزدە 18 ملن ادام، ونىڭ باسىم بولىگى تەلەۆيزوردا وتىراتىن "مەششاندار", بىزدە ءبارىبىر سايلاۋدىڭ تاعدىرىن شەشەتىن وسى "مەششاندار" بولادى اۋ وسى.
ەندى وسى "مەششاندار" دەگەننىڭ كىم ەكەنىنە توقتالسام.. بۇلار جۇمىس پەن ءۇي ەكى ورتاسىندا عانا عۇمىر كەشەتىن ادامدار، بۇلار "ەل - جەر", "ساياسات", "كەلەشەك" دەگەنگە باستارىن قاتىرا قويمايدى. ادەتتە بۇلاردىڭ نارازىلىعى ەش زيانى جوق كۇڭكىلدەن اسپايدى. تازا توعىشارلار.
ءبارىن تەلەۆيزوردان ءبىلىپ، كورىپ، سوعان قۇلاي سەنىپ وتىرادى. وزگە جۇرت تەلەفونعا شۇقشيىپ جەلىدەن اقپارات ىزدەپ وتىرسا، بۇل "مەششانداردا" ونداي نارسە جوق، بۇلار تەلەفوندى تەك زۆانداسۋ ءۇشىن نەمەسە ارا - تۇرا ۆاتساپقا كىرۋ ءۇشىن پايدالانادى. "جىلاي بەرمەي جۇمىس ىستەۋ كەرەك، قازاقتىڭ ءوزى جالقاۋ، قيمىلداۋ كەرەك"."كىم ۇرلاماي جاتىر، ءبارى ۇرلايدى، سەن دە ۇرلايسىڭ" دەگەن ءسوز دە تاپ وسىلاردىڭ سوزدەرى.
ول ول ما، تەلەۆيزور اناعان داۋىس بەر دەسە، مىنالار سوعان بارىپ ءبىر كىسىدەي داۋىس بەرەدى، ال كانديداتى ۋجە تاققا وتىرىپ العان ونىڭ نە دەيتىنى بەلگىلى. "مەششاندار" تۇپ - تۋرا سول تاققا بارىپ داۋىس بەرىپ كەلەدى. "نە ءۇشىن داۋىس بەردىڭىز" دەپ سۇراساڭىز، "ۋجە وتىر عوي" دەيدى. سوندىقتان بۇلاردىڭ جاپىرلاپ سايلاۋعا بارعانى، بۇلار ءبارىن بىلىقتىردى دەپ ەسەپتەي بەرىڭىز. جالپى، "مەششاندار" سانى كوپ وتە الەۋەتتى قاۋىم. ءبىزدىڭ مەملەكەتىمىزدىڭ كەلەشەگىن ءىس جۇزىندە وسىلار انىقتاپ وتىر جانە ءالى ۇزاق سولاي بولادى، دالىرەك ايتساق وسىلاردىڭ ناداندىعى شەشەدى.
قالاي دەسەك تە بىزدەگى "بويكوتشىلار" مەن قوسانوۆتىڭ جاقتاستارى انا قاۋىمعا قاراعاندا وتە كرەاتيۆنىي حالىق جانە ءوزارا مۇددەلەس توپتار، بۇلاردىڭ تاسىلدەرى ءارتۇرلى بولعانىمەن، بۇلار وزگەرىستى قالاعان ءبىر اتانىڭ بالالارى دەپ تە ويلايمىن. الايدا، وكىنىشكە وراي ينتەرنەت حالقىنىڭ سانى از. سايلاۋدىڭ اتى سايلاۋمەن، بىراق بىزدە ءبارىن سول "مەششاندار" شەشەدى.
ولجاس ءابىل
"ادىرنا" ۇلتتىق پورتالى
