ۇجىمدىق قاۋىپسىزدىك تۋرالى شارت ۇيىمى تاجىكستان تاراپىنان كومەك سۇرالدى دەگەن اقپاراتقا قاتىستى تۇسىنىكتەمە بەردى، دەپ حابارلايدى «ادىرنا» ءتىلشىسى.
ۇيىمنىڭ مالىمدەمەسىندە Telegram ارنالاردا تاراعان دەرەكتەردىڭ شىندىققا جاناسپايتىنى ايتىلعان.
«2025 جىلعى 26 جانە 30 قاراشادا بولعان وقيعالارعا بايلانىستى تاجىك تاراپى ۇقشۇ-عا قانداي دا ءبىر كومەك سۇراپ جۇگىنگەن جوق»، — دەلىنگەن حابارلامادا.
سونداي-اق تاجىكستاننىڭ ۇقشۇ-مەن اۋعانستان شەكاراسىن نىعايتۋ اياسىنداعى ءوزارا ءىس-قيمىلى ءتيىستى ماقساتتى مەملەكەتارالىق باعدارلاما نەگىزىندە جۇزەگە اسىرىلىپ جاتقانى اتاپ ءوتىلدى.
ەسكە سالايىق، بۇعان دەيىن Reuters اگەنتتىگى تاجىكستاننىڭ اسكەري كومەك سۇراعانى تۋرالى اقپارات تاراتقان ەدى. باق ەلدىڭ اۋعانستانمەن شەكاراداعى قاۋىپتىڭ كۇشەيۋىنە بايلانىستى الاڭداۋشىلىق بىلدىرگەنىن جازعان. الايدا تاجىكستان ءسىم بۇل اقپاراتتى جوققا شىعاردى.
