پروفەسسور كاكەن قامزين الاياقتاردىڭ الداپ، جىمقىرعان 32 ميلليون تەڭگەنىڭ تولىق جينالعانىن حابارلادى. بۇل تۋرالى ول Facebook-تەگى رەسمي پاراقشاسىندا جازدى، دەپ حابارلايدى “ادىرنا”.
ونىڭ ايتۋىنشا، ءبىر جارىم اي بۇرىن الاياقتارعا الدانىپ، باسپاناسىنان ايرىلىپ قالا جازداعان سوڭ، 5 شىلدەدەن باستاپ ەل-جۇرتتان «جىلۋ» جيناۋعا ءماجبۇر بولعان. وسى ۋاقىت ىشىندە كوپشىلىكتىڭ قولداۋىمەن 9,5 ميلليون تەڭگە جينالعان.
بۇگىن، قامزيننىڭ سوزىنشە، اتى-ءجونىن اتاماۋدى وتىنگەن ءبىر قايىرىمدى ازامات جەتىسپەي تۇرعان 23 ميلليون تەڭگەنى قولما-قول اكەلىپ بەرگەن.
«بۇل تەك قارجىلاي كومەك قانا ەمەس، سەنىمنىڭ، بىرلىكتىڭ، مەيىرىمنىڭ ناعىز كورىنىسى. ول ازاماتقا اللا رازى بولسىن!» — دەپ جازدى پروفەسسور.
ەندى ول جينالعان قاراجاتتى ساتىپ الۋشى وتباسىعا بەرىپ، ءۇيىن ءوز اتىنا قايتا راسىمدەۋگە كىرىسپەك. كاكەن قامزين كومەك كورسەتكەن، تىلەكتەس بولعان بارشا جۇرتقا شىنايى العىسىن ءبىلدىرىپ، قازاقتىڭ باۋىرمالدىعى مەن جاناشىرلىعى جوعالماعانىن اتاپ ءوتتى.
