شىمكەنت قالاسىندا «جايلى مەكتەپ» ۇلتتىق جوباسى اياسىندا 12 ءبىلىم ۇياسىنىڭ قۇرىلىسى ءجۇرىپ جاتىر. وعان قوسا تاعى 13 مەكتەپتىڭ جوبالىق-سمەتالىق قۇجاتتاماسى دايىندالىپ، رەسپۋبليكالىق بيۋدجەتتەن قارجىلاندىرۋعا ۇسىنىلعان.
بۇل تۋرالى شىمكەنت قالاسى اكىمدىگىنىڭ ءبىلىم باسقارماسىنان حابارلادى.
باسقارمانىڭ مالىمەتتەرىنە سۇيەنسەك، «جايلى مەكتەپ» ۇلتتىق جوباسىن اياسىندا شىمكەنت قالاسىندا 2025 جىلعا دەيىن 28 000 ورىندىق 18 مەكتەپتىڭ قۇرىلىسىن سالۋ جوسپارلانۋدا. ونىڭ ىشىندە 2000 ورىندىق – 8 مەكتەپ، 1500 ورىندىق – 2 مەكتەپ، 1200 ورىندىق – 7 مەكتەپ جانە 600 ورىندىق 1 مەكتەپ بار.
جالپى، شىمكەنت قالاسىندا 2022 جىلى 46 مەكتەپ اشىلسا، بيىل 21 مەكتەپ پايدالانۋعا بەرىلگەن. ونىڭ ىشىندە 3 مەملەكەتتىك مەكتەپتىڭ قوسىمشا عيماراتتارى مەن 19 928 وقۋشىعا ارنالعان 18 جەكەمەنشىك مەكتەپ بار. اتقارىلعان جۇمىستاردىڭ ناتيجەسىندە شىمكەنت قالاسىندا ءۇش اۋىسىمدا وقىتاتىن مەكتەپتەردىڭ ماسەلەسى تولىعىمەن شەشىمىن تاپقان.
ينفراقۇرىلىمنىڭ دامۋى مەن مەكتەپتەردىڭ ماتەريالدىق-تەحنيكالىق بازاسىنىڭ نىعايۋى ءبىلىم ساپاسىنا دا وڭ اسەر ەتكەنى ءسوزسىز. شىمكەنتتىك وقۋشىلاردىڭ ءبىلىم ساپاسىنا قاتىستى كورسەتكىشتەرى جىلدان جىلعا جاقسارىپ كەلەدى. ماسەلەن، 2021-2022 وقۋ جىلى ءبىلىم ساپاسىنىڭ دەڭگەيى 51,1 پايىزدى قۇراسا، 2022-2023 وقۋ جىلى 56,2 پايىز قۇراپ، 5,1 پايىزعا وسكەن. شىمكەنتتىك وقۋشىلار حالىقارالىق جانە رەسپۋبليكالىق ءبىلىم سايىستارىنان 2023 جىلى 92 جۇلدەلى ورىنعا يە بولعانىن ايتا كەتكەن ءجون.
سونىمەن قاتار بيىل 134 228 وقۋشى كۇنىنە ءبىر مەزگىل ىستىق تاماقپەن جانە 53 893 بالا مەكتەپ فورماسى ءۇشىن بەرىلەتىن ءبىر رەتتىك قارجىلاي قولداۋمەن قامتىلعان.
ايتا كەتەيىك، شىمكەنت قالاسىندا وقۋشىلاردى قوسىمشا بىلىممەن قامتۋ ماسەلەسىنە ايرىقشا نازار اۋدارىلىپ وتىر. ماسەلەن، 2022 جىلى قالادا قوسىمشا بىلىممەن قامتۋ كورسەتكىشى 77,2 پايىزدى (191 199 وقۋشى) قۇراسا، 2023 جىلدىڭ 9 اي قورىتىندىسىمەن 84.2 پايىزدى قۇراپ، 210 278 وقۋشىعا جەتكەن. بيىل وقۋشىلاردىڭ 85,4 پايىزىن قوسىمشا بىلىممەن قامتۋ جوسپارلانعان. بۇل مەجەگە جەتۋ ءۇشىن 2023 جىلى جان باسىنا قارجىلاندىرۋ ەسەبىنەن 5 000 بالانى قوسىمشا بىلىممەن قامتۋ ءۇشىن 516,5 ملن. تەڭگە قارجى قارالىپتى.
