پرەزيدەنتتىڭ بۇرىنعى كەڭەسشىسىنەن قىسىم كورگەن ءمولدىر قابىلوۆا توقاەۆتان كومەك سۇرايدى، دەپ حابارلايدى "ادىرنا" ءتىلشىسى Stan.kz اقپارات اگەنتتىگىنە سىلتەپ.
ولجاس قۇدايبەرگەنوۆتىڭ ايەلى ءمولدىر قابىلوۆا پرەزيدەنت قاسىم-جومارت توقاەۆقا بەينە ۇندەۋ جولداپ، كومەك سۇراۋدا.
ولجاس قۇدايبەرگەنوۆتىڭ ايەلى ءمولدىردىڭ ايتۋىنشا، ول 2022 جىلدىڭ قاڭتارىندا اجىراسۋعا شەشىم قابىلداعان. ال ناۋرىزدا ولجاس قۇدايبەرگەنوۆ كامەلەتكە تولماعان بالالارىن اناسىنان ايىرىپ، ۇلىبريتانيادان الىپ كەتپەك بولعان.
بريتان پوليتسياسى اكەنى اۋەجايدا ۇستاپ، بالالاردى اناسىنا قايتارعان. ۇلىبريتانيانىڭ الەۋمەتتىك قىزمەتى ءمولدىردى بالالارىمەن بىرگە باسپاناسىزدارعا ارنالعان ۇيگە ورنالاستىرعان. قابىلوۆا ۇزاق ۋاقىت بويى ەشقايدا شاعىمدانباعان كورىنەدى.
بىراق 2022 جىلدىڭ ناۋرىزىنان باستاپ قازىرگە دەيىن كۇيەۋى، پرەزيدەنتتىڭ بۇرىنعى كومەكشىسى ولجاس قۇدايبەرگەنوۆتەن قىسىم كورىپ كەلگەن. ءمولدىر قابىلوۆا:
“ولجاس جالعا الىنعان ءۇيدىڭ اقشاسىن تولەۋدەن باس تارتتى. ءتورت بالاممەن دالادا قالدىم. اكەم ونىڭ ارەكەتىنە اشۋلانىپ، ودان اكەلىك مىندەتتەرىن ورىنداۋدى، وقۋ جىلىنا دەيىن جالعا الىنعان پاتەردىڭ اقىسىن تولەپ بەرۋدى تالاپ ەتتى. بىراق ول اكەمنىڭ ۇستىنەن “بوپسالادى” دەگەن ايىپپەن ارىز جازعان”، – دەيدى.
ايەلدىڭ ايتۋىنشا، ونىڭ اكەسى بىردەن قاماۋعا الىنعان. قارت كىسى پوليتسيا بولىمىندە ەسىنەن تانىپ قۇلاپ، باس سۇيەگىن، جامباس سۇيەگىن جانە اياقتارىنىڭ سۇيەكتەرىن سىندىرىپ العان، سودان كەيىن 4 اي بويى توسەكتەن تۇرا الماعان.
ءمولدىر حالىقارالىق باعدارلامالار ورتالىعى ارقىلى 2023 جىلدىڭ اقپان ايىنان باستاپ الىپ وتىرعان "بولاشاق" ستيپەندياسىنىڭ ولجاس قۇدايبەرگەنوۆتىڭ توقتاتىپ تاستاعانىن، ءتىپتى "بولاشاق" باعدارلاماسىنا كەپىلگە قويعان پاتەرىن تارتىپ الىپ، ساتىپ جىبەرگەنىن ايتادى.
2023 جىلدىڭ قازان ايىندا قۇدايبەرگەنوۆتىڭ ارىزى بويىنشا پوليتسيا "بوپسالادى" دەگەن ايىپپەن ايەلدىڭ اكەسىن تاعى ەكى ايعا قاماۋعا العان.
ال “نەمولچيKZ” قورى قۇدايبەرگەنوۆتىڭ ايەلىنە قويعان تالابىن جاريالادى. ولجاس قۇدايبەرگەنوۆ ايەلىنە ۇيگە كەلەتىن ءاربىر ادامدى تەك ءوزىنىڭ رۇقساتىمەن شاقىرۋىن، قوناققا بارماۋىن، ء"ومىر بويى بەلگىلى ءبىر ادامدارمەن" ارالاسپاۋىن، ءارى قايىن اتاسى ايتقان سوزدەرى مەن ارەكەتى ءۇشىن وزىنەن كەشىرىم سۇراۋىن تالاپ ەتكەن.
"نەمولچيKZ" قورى وسى ماسەلەنى شەشۋ ءۇشىن پرەزيدەنتكە شاعىمدانىپ، كومەك سۇراۋعا ءماجبۇر بولعان.
ەسكە سالا كەتەيىك، ولجاس قۇدايبەرگەنوۆ – ۇلتتىق ەكونوميكا مينيسترلىگى جانىنداعى باسقارۋشى كەڭەستىڭ توراعاسى قىزمەتىن اتقارادى.
