17 ناۋرىزدا "ۋرالسكايا نەدەليا" باسىلىمى رەسەيدىڭ بايلانىس، اقپاراتتىق تەحنولوگيالار مەن بۇقارالىق كوممۋنيكاتسيالار سالاسىن قاداعالايتىن "روسكومنادزور" مەملەكەتتىك مەكەمەسىنەن ەسكەرتۋ حات الدى، دەپ حابارلايدى «ادىرنا» ءتىلشىسى ازاتتىققا سىلتەمە جاساپ.
حاتتا سايتتان وتكەن جىلى جاريالانعان ۋكرايناداعى بەيبىت تۇرعىندار اراسىنداعى قۇرباندار تۋرالى ماتەريالدى ءوشىرۋ تالاپ ەتىلگەن.
ورالدىق باسىلىم The Moscow Times ونلاين-گازەتىنەن كوشىرىپ باسقان ماقالادا 12 اقپاندا اقش پرەزيدەنتى دونالد ترامپ پەن رەسەي پرەزيدەنتى ۆلاديمير پۋتين تەلەفونمەن "ۇزاق جانە وتە ءونىمدى" اڭگىمەلەسكەننەن بەرى رەسەي ۋكرايناعا 3000-نان استام درون مەن كەمىندە 35 زىمىران اتقىلاعانى جونىندە ۋكراينا اۋە كۇشتەرىنىڭ دەرەگى كەلتىرىلگەن ەدى. بۇعان قوسا ۋكراين شەنەۋنىكتەرىنىڭ مالىمەتىنە سۇيەنگەن امەريكالىق CNN تەلەارناسىنىڭ ەسەبىنشە، 75-تەن استام بەيبىت تۇرعىن قازا تاۋىپ، 300-گە جۋىق ادام جارالانعان دەپ جازىلعان.
روسكومنادزور بۇل جاريالانىمدى
"شىنايى حابار اتىن جامىلىپ، قوعام قاۋىپسىزدىگىنە قاتەر توندىرەتىن" جانە "رەسەيدەگى الەۋمەتتىك-ساياسي جاعدايدى شايقالتۋدى كوزدەگەن جالعان اقپارات تاراتۋ" دەپ باعالاعان. بۇل كونتەنت رەسەيدىڭ "اقپارات، اقپاراتتىق تەحنولوگيالار جانە اقپاراتتى قورعاۋ تۋرالى" زاڭىن بۇزدى دەگەن "روسكومنادزور" قازاقستاندىق باسىلىمنان ينتەرنەت رەسۋرسىنان ماقالانى 24 ساعاتتىڭ ىشىندە الىپ تاستاۋدى تالاپ ەتكەن.
«ۋرالسكايا نەدەليا» باس رەداكتورى تامارا ەسلاموۆا بۇل جاعدايدى ابسۋرد دەپ باعالادى.
ء«وز حالقىن ەركىندىگىنەن ايىرىپ، تەمىر پەردەنىڭ ارعى جاعىنا قايتادان تىعىپ جاتقانى ازداي، ونىسىن وزگەلەرگە دە تاڭۋعا تىراشتانعان مەملەكەتتىڭ اقىلىنان اداسقان مەملەكەتتىك ورگانىنىڭ قىلىعى. ولار ءبىزدى وزىنە قوسىپ الدىق دەپ ويلاي ما ەكەن؟ ءبىز قۇددى سولاردىڭ ازاماتىنداي، سولاردىڭ بۇقارالىق اقپارات قۇرالىنداي حات جولداپتى»،-دەدى جۋرناليست.
"روسكومنادزور" بيىل اقپان ايىندا قازاقستاندىق قازتاگ اقپارات اگەنتتىگى سايتىن بۇعاتتاۋدى تالاپ ەتكەن حاتىن دا سول سايت ورنالاسقان سەرۆەرلەردى قامتاماسىز ەتەتىن "PS ينتەرنەت كومپانياسىنا" جىبەرگەن ەدى. قازتاگ مالىمەتىنشە، "روسكومنادزور" تالابىنا 2026 جىلعى 20 قاڭتاردا ماسكەۋ قالالىق سوتى قابىلداعان شەشىم نەگىز بولعان. رەسەي تارابى قازتاگ باسشىلىعى، ولاردىڭ ادۆوكاتتارى جانە Freedom Finance قارجى ۇيىمى سالىمشىلارى قاتىسقان ءباسپاسوز جيىندارىنان تۇسىرىلگەن ۆيدەولار مەن كوپشىلىك الدىنداعى مالىمدەمەلەردى جانە وزگە ماتەريالداردى اۆتور قۇقىعىن بۇزۋ دەپ باعالاعان. قازتاگ رەسەيدەگى سوت تۋرالى الدىن الا حاباردار ەتىلمەگەنىن ايتقان. اگەنتتىك ول جايىندا 3-4 اقپان كۇندەرى سايتتىڭ ۋاقىتشا اشىلماي قالۋىنىڭ سەبەبىن بىرقاتار قازاقستاندىق ينتەرنەت-پروۆايدەرلەردەن انىقتاعان كەزدە كەزدەيسوق بىلگەن. ول جولى "PS ينتەرنەت كومپانياسى" وكىلدەرى رەسەيلىكتەردىڭ تالابىنا قاراماستان قازتاگ سايتىن بۇعاتتاماعانىن ايتقان ەدى.
17 ناۋرىزدا "روسكومنادزور" ورالدىق "ۋرالسكايا نەدەليا" گازەتىمەن بىرگە قازاقستاندىق تاعى ءبىر اقپارات قۇرالى – Exclusive.kz ونلاين-باسىلىمىنا دا ەسكەرتۋ حات جىبەرگەن. وعان دا رەسەيدىڭ ۋكرايناعا قارسى باسقىنشىلىق سوعىسىنا قاتىستى جاريالانعان كونتەنت ىلىك بولعان.
Exclusive.kz رەداكتسياسى كەيىنگى جىلدارى "روسكومنادزور" مەكەمەسىنەن ۋكرايناداعى سوعىس تاقىرىبىنا جاريالاعان ماتەريالدارعا قاتىستى بىرنەشە رەت ەسكەرتۋ حات العانىن جازدى.
