جەلىدە ەكس-پرەزيدەنت نۇرسۇلتان نازارباەۆ پەن ونىڭ ءىنىسى بولات نازارباۆپەن كەزدەسىپ، بىرگە تۇسكەن سۋرەتى تارادى. بۇل تۋرالى جازۋشى بەيبىت ساپارالى Facebook پاراقشاسىنا جازدى، دەپ حابارلايدى “ادىرنا” ۇلتتىق پورتالى.
جازبا بويىنشا، نۇرسۇلتان نازارباەۆ الماتىعا دەنساۋلىعى سىر بەرىپ جاتقان ىنىسىنە بارعان. ولاردىڭ قاسىندا قاڭتار وقيعاسىنا قاتىستى تەرگەلىپ جاتقان نەمەرە ءىنىسى سامات ءابىش بار. فوتوسۋرەتتىڭ ناقتى كۇنى بەلگىسىز.
“قاراشا، جەلتوقسان مەن سول ءبىر ەكى اي” دەگەندەيىن، جاڭا اي مەن جاڭا اپتادان كوپ جاقسىلىقتار، ىرىس-بەرەكە كۇتەيىك! سويتە تۇرا وتكەن اپتا سوڭىندا ەل ءىشىن ەلەڭ ەتكىزگەن ەكس-پرەزيدەنت وتباسىنا بايلانىستى شۇعىل جاعدايعا وراي ءوز جەكە كوزقاراسىمىزدى كوپشىلىك وقىرمان نازارىنا ۇسىنايىق. بىزگە جەتكەن سەنىمدى اقپارات دەرەگى بويىنشا ۇستىمىزدەگى 2023 جىلعى قىركۇيەك ايىنىڭ باسىندا نۇرسۇلتان ءابىشۇلى الماتىعا جەكە جۇمىستارىمەن كەلىپ، بىرنەشە كەزدەسۋلەر وتكىزىپ، ارتىنشا تۋعان اۋىلىن، تۋىپ-وسكەن قارا شاڭىراعىن، ۇشقوڭىر جايلاۋىن، اتا-بابالار جەرلەنگەن قورىمىن زيارات ەتكەن ەكەن. شامالعان-ۇشقوڭىرداعى قارا شاڭىراق ۇيىنە ەتجاقىن تۋىستارىن جيناپ، كوپتەن بەرى كورىسپەگەن ءىنى-قارىنداس، كەلىندەرىمەن ءبىر داستارحان باسىندا سۇحبات قۇرىپ، قوردالانىپ قالعان ىشكى اۋلەتتىك ماسەلەلەر بويىنشا اشىق پىكىر الماسقان. ەسكەرتپە مەن وكپە-رەنىشتەرىن دە جاسىرماعان. باسقوسۋ سوڭىندا ءابىش اكەلەرى ءبىر عاسىرداي ۋاقىت بۇرىندا اۋلاعا ءوز قولىمەن ەككەن، قازىرگى تاڭدا ەسىك الدىندا جايقالىپ ءوسىپ تۇرعان ءزاۋلىم ەمەن اعاشىنىڭ جانىندا تۇرىپ نۇراعاڭنىڭ ماقۇلداۋىمەن بارلىعى ەستەلىككە سۋرەتكە تۇسكەن”، دەپ جازدى ول.
سونداي-اق، جازۋشى بولات نازارباەۆتىڭ اۋىر حالدە ەكەنىن جازدى.
“ەكى جىلدان استام ۋاقىت بويى مۇلدەم سويلەۋدەن قالىپ، ءوز اياعىمەن جۇرە الماعاندىقتان سال بولىپ قول ارباعا تاڭىلعان، “اۋرۋ ادام اشۋشاڭ، تىرىسقاق كەلەدى” دەپ ءسال نارسەگە كوڭىلى قالىپ بۇلقان-تالقان كۇي كەشەتىن بولات ءابىشۇلىنا قوشتاسار ساتتە ساۋىعىپ كەت دەپ بارلىعى دا سول جەردە جاقسى دۇعا-تىلەكتەرىن جاۋدىرعان. سودان بەرىدەگى ەكى اي ىشىندە ءوز ەلىمىز عانا ەمەس، بۇكىل الەمدە ساياسي احۋال قاتتى ۋشىعىپ، ءار-ءار تۇستان قارۋلى قاقتىعىستار مەن سوعىس ءورتى تۇتانىپ كەتتى. قانداي ەرەكشە كۇتىم، ەم-دوم شارالارىن قولدانىپ باققانمەن جەتپىس جاستاعى بولات ءابىشۇلىنىڭ دەنساۋلىعى كۇن ساناپ كۇرت ناشارلاي بەرىپ، كۇنى كەشە وتە اۋىر حالدە الماتىداعى ورتالىق كلينيكالىق اۋرۋحاناعا جەدەل جاردەم كومەگىمەن جانساقتاۋ بولىمىنە جەتكىزىلگەن. البەتتە، ماڭگىلىك ءومىر سۇرەتىن ەش پەندە جوق. جالعان عۇمىر شولتاڭ ەتىپ وتە شىقپاقشى. جان تاپسىرۋ، تاننەن رۋحتىڭ شىعۋى دا مەيلىنشە قيىن ءۇردىس. توزاڭنىڭ سالماعىنداي جاقسى جانە جامان ىستەرىڭ تارازىعا تارتىلاتىن ماڭگىلىك اقىرەت الەمى بارشا قۇدايدىڭ قۇلدارىن الدا بايىپپەن كۇتىپ تۇر. قابىر سۇراۋى، قابىر ازابى، قابىردەگى ءجانناتي حال بىلە-بىلسەك بار پەندەگە تىم جاقىن”-, دەپ جازدى بەيبىت ساپارالى.
سونىمەن قاتار، ول 2019 جىلعى سايلاۋدان كەيىن، اسىرەسە 2022 جىلعى قاڭتار قاسىرەتىنەن سوڭ نازارباي اۋلەتىنە قاراتىلعان سىن پىكىرلەر مەن سۇراۋلار تىم كوبەيىپ كەتكەنىن ايتادى. ولجاس سۇلەيمەنوۆ، مىرزاتاي جولداسبەكوۆ، بالتاش تۇرسىنباەۆ، امانگەلدى شابدارباەۆ، ءسات توقپاقباەۆ، بەردىبەك ساپارباەۆ، اكەجان قاجىگەلدين، ءالنۇر مۇساەۆ، نارتاي دۇتپاەۆ، ءادىل شاياحمەتوۆ، جاقسىبەك كۇلەكەەۆ، سەرىك ءابدىراحمانوۆ، ءاليحان بايمەنوۆ، راتبەك قاجى نىسانبايۇلى، عازيز الدامجاروۆ، اسلان مۋسين، ورالباي ابدىكارىموۆ، عالىمجان جاقيانوۆ، مۇحتار ءابليازوۆ، ۆيكتور حراپۋنوۆ، جاقسىبەك بازىلباەۆ جانە ت.ب. قايراتكەرلەر اشىق سۇحبات الاڭىنا شىعىپ، تاۋەلسىزدىكتىڭ العاشقى وتىز جىلىنداعى سان قيلى وقيعالارعا ءوز تۇرعىسىنان باعا بەرىپ جاتقانىمەن، ءادىل دە تولىمدى جاۋاپتى قالىڭ قاۋىم ءالى دە وزگەلەردەن اسىعا كۇتۋمەن بولعانىن جازدى.
“بۇل ورايدا الداعى ۋاقىتتا نۇرتاي ابىقاەۆ، اسقار قۇلىباەۆ، يمانعالي تاسماعامبەتوۆ، بولات وتەمۇراتوۆ، ادىلبەك جاقسىبەكوۆ، احمەتجان ەسىموۆ، ماحمۇد قاسىمبەك، داريعا نازارباەۆا، تايىر مانسۇروۆ، قايرات ءمامي، تيمۋر قۇلىباەۆ، كارىم ءماسىموۆ، مۇحتار التىنباەۆ، دانيال احمەتوۆ، تولەۋتاي سۇلەيمەنوۆ، بەرلين يريشەۆ، باقىتجان ساعىنتاەۆ، سەرىك ۇمبەتوۆ، ساعىمبەك تۇرسىنوۆ، شالباي قۇلماحانوۆ، ومىرزاق شۇكەەۆ، وراز جاندوسوۆ، مارات ءتاجين، التىنشاش جاعانوۆا، بىرعانىم ءايتىموۆا، باقىت وسپانوۆ، سيازبەك مۇقاشەۆ، قىرىمبەك كوشەرباەۆ، گۇلشارا ابدىقالىقوۆا، توقتار اۋباكىروۆ، تالعات مۇساباەۆ، اليك شپەكباەۆ، اماندىق باتالوۆ جانە ت.ب. ايتىلماي قالعان تۇلعالار بىرنەشە ساعاتتاپ اشىق سۇحبات بەرىپ، بۇكپەسىز ءوز ويلارىمەن، دالەلدى بايلامدارىمەن پىكىر بولىسەدى دەپ ۇمىتتەنەمىز. نەعۇرلىم پىكىر الۋاندىعى بولسا، سوعۇرلىم وتكەندەگى تاريحي وقيعالاردى باعالاۋعا تۋرا جول اشىلماقشى”، دەپ جازدى.
جازۋشى “كورىنبەي” كەتكەن نۇرسۇلتان نازارباەۆتىڭ كىتاپ جازۋ ۇستىندە ەكەنىن دە ايتا كەتتى.
“نۇرسۇلتان ءابىشۇلى سوڭعى بىرنەشە جىل ىشىندە عۇمىرنامالىق قوماقتى كىتاپ جازۋ ۇستىندە ەكەندىگىنەن حابارىمىز بار. جاقىن ارادا ول ەڭبەك جارىق كورەتىن بولسا كوپشىلىكتى تولعانتىپ جۇرگەن بىرقانشا سۇراۋلارعا ناقتى جاۋاپ الامىز با دەگەن ۇكىلى ءۇمىتىمىز دە جوق ەمەس. مەمۋاردى وقىعان سوڭ سۇراۋلار مەن سىن پىكىرلەر دە قارداي بورايتىنى اقيقات. جاسى ۇلعايعانىنا قاراماي ول وتكىر ساۋالدارعا دا ىلكىمدىلىكپەن جاۋاپ بەرەتىن بولسا كوپتەگەن اقتاڭداق ماسەلەلەر قۇپياسى جارياعا شىعىپ، كەلەر ۇرپاققا ايقىن باعدارشى بولار ەدى. مىنە، سونان سوڭ نۇرسۇلتان ءابىشۇلى قازاق جانە ورىس تىلدەرىندە كەڭ اۋقىمدا اشىق سۇحباتتار بەرەتىن بولسا، ەل باسقارۋعا بەل شەشە كىرىسكەن كەلەسى ۇرپاق بۋىنىنا تاريحي ساباقتىڭ جۇمباق قاتپارلارى جانە اشىلا تۇسپەكتىگىنە بەرىك سەنىم بار”، دەپ قورىتىندىلادى.
ايتا كەتەيىك، بۇعان دەيىن قاراعاندى شاحتاسىندا بولعان قايعىلى وقيعاعا نۇرسۇلتان نازارباەۆتىڭ كوڭىل ايتپاعانىن, كەيىن ونىڭ دەنساۋلىعى نازار اۋدارتا باستاعانىن جازعان ەدىك.
