اشىلۋ سالتاناتىنا «استانا» فۋتبول ورتالىعىنىڭ تاربيەلەنۋشىلەرى، قازاق فۋتبولىنىڭ ارداگەرلەرى، وتاندىق فۋتبول كلۋبتارىنىڭ جەتەكشىلەرى، قازاقستان ۇلتتىق قۇراماسىنىڭ باس باپكەرى ماگومەد اديەۆ پەن ۇلتتىق قۇراما ويىنشىلارى باۋىرجان يسلامحان مەن يان ۆوروگوۆسكي قاتىستى.
بۇل مۋزەي نەگىزىنەن سەمەيدە باستاۋ العان قازاقستان فۋتبولىنىڭ تاريحىن جاڭعىرتۋ ءۇشىن جاسالعان. مادەني ورىنعا ەلىمىزدىڭ تۇكپىر-تۇكپىرىنەن سپورتتىق جادىگەرلەر، دەرەكتەر جازىلىپ، قويىلعان.
قازاقستان فۋتبول فەدەراتسياسىنا مۋزەيدىڭ اشىلۋىنا وراي فيفا جانە ۋەفا-دان قۇتتىقتاۋ حاتتارى كەلىپ ءتۇستى.
بىرنەشە اي بۇرىن مەن سىزدەردىڭ ادەمى ەلدەرىڭىزگە بارىپ، قازاقستاندا فۋتبولعا دەگەن كەرەمەت قۇشتارلىق پەن سۇيىسپەنشىلىكتى ءوز كوزىممەن كورۋ مۇمكىندىگىنە يە بولدىم. مۋزەي ەلدەگى فۋتبولدىڭ 110 جىلدىق تاريحىنا، ىستەرگە، تۇلعالارعا، سونداي-اق سپورتىمىزدى دامىتىپ جاتقان بارلىق ادامدارعا قۇرمەت كورسەتۋگە ءوز ۇلەسىن قوساتىنى ءسوزسىز، - دەپ جازىلعان فيفا پرەزيدەنتى دجانني ينفانتينونىڭ حاتىندا.
ۋەفا پرەزيدەنتى الەكساندەر چەفەرين دە ۇلتتىق قۇرامانى قۇتتىقتادى.
قازاقستان فۋتبول فەدەراتسياسىن مۋزەيدىڭ رەسمي اشىلۋىمەن قۇتتىقتاعىم كەلەدى. وسىنداي ماڭىزدى وقيعالار ۇلتتىق قاۋىمداستىقتىڭ دۇرىس باعىتتا دامىپ، ۋەفا-عا مۇشە قاۋىمداستىقتار اراسىندا بەدەلگە يە بولعانىنىڭ دالەلى بولدى. سىزدەردىڭ ۋەفا كلۋبتىق جارىستارىنا قاتىسۋلارىڭىز جانە ۇلتتىق قۇرامانىڭ جەتىستىكتەرى قاۋىمداستىقتىڭ بارلىق دەڭگەيدەگى پروگرەسسىن كورسەتەدى، ال الداعى ۋاقىتتا ەۋروپالىق فۋتبولدا ودان ءارى تولىق باسەكەگە تۇسۋگە مۇمكىندىكتەرىڭىز بار. قفف-عا تابىس تىلەيمىن، ويتكەنى سىزدەر بۇل دارەجەگە جەتۋ ءۇشىن ۇزاق جولدان وتتىڭىزدەر جانە قازىرگى تابىستارىڭىز – فۋتبولمەن ءومىر سۇرەتىن جانە فۋتبولدى جاقسى كورەتىندەرگە ارنالعان، - دەلىنگەن حاتتا.
بۇل مۋزەيدە اتاقتى فۋتبولشى، جاتتىقتىرۋشى تيمۋر سەگىزباەۆتىڭ جەكە زاتتارىن كورۋگە بولادى. ونى ايگۇل سەگىزباەۆا ارنايى تابىستاعان.
سونداي-اق، سپورت ءجۋرناليسى ءالىم ءىلياسۇلى مۋزەي قورىنا كوپتەگەن ادەبيەت پەن باسقا دا جادىگەرلەردى تاپسىردى.
