1 مامىردا استانادا رەسەيدىڭ ەڭبەك سىڭىرگەن جاتتىقتىرۋشىسى، مانەرلەپ سىرعاناۋدان باپكەر ەتەري تۋتبەريدزەنىڭ «مۇزداعى چەمپيوندار» اتتى مۇز شوۋى ءوتۋى ءتيىس ەدى. الايدا بۇگىن، 1 ساۋىردە ونىڭ توقتاتىلعانى بەلگىلى بولدى، دەپ حابارلايدى «ادىرنا» ءتىلشىسى.
شوۋعا الينا زاگيتوۆا، ەۆگەنيا مەدۆەدەۆا، الەكساندرا ترۋسوۆا جانە باسقا دا مانەرلەپ سىرعاناۋشىلار، سونىڭ ىشىندە ەليزابەت تۇرسىنباەۆا قاتىسادى دەپ جوسپارلانعان بولاتىن. تۇرسىنباەۆا — قازاقستان تاريحىندا الەم چەمپيوناتىنىڭ كۇمىس جۇلدەسىن يەلەنگەن العاشقى سپورتشى.
«Mash نا سپورتە» Telegram-ارناسىنىڭ مالىمەتىنشە، ۇيىمداستىرۋشىلار «بارىس ارەنا» كەشەنىمەن كەلىسىمشارتتى 2025 جىلدىڭ تامىز ايىندا جاساعان، ال قازان ايىندا مەملەكەتتىك ورگانداردان مۇز شوۋىن وتكىزۋگە رەسمي رۇقسات العان.
«الايدا وليمپيادا ويىندارى اياقتالعاننان كەيىن ارەنا وكىلدەرى ەشقانداي تۇسىنىكتەمە بەرمەستەن كەلىسىمدى بۇزدى»، – دەلىنگەن حابارلامادا.
ماسكەۋدىڭ ۋكرايناداعى سوعىسىن قولدايتىن انشىلەر مەن ونەر ادامدارىنىڭ قازاقستانداعى گاسترول، كەزدەسۋ-كەشتەرى الدىن-الا جوسپارلانىپ، وتپەي قالۋى ۇيرەنشىكتى جايعا اينالدى. تاياۋدا ءانشى پولينا گاگارينانىڭ 5 ساۋىرگە استانادا جوسپارلانعان كونتسەرتى دە وتپەيتىن بولدى.
