وزبەكستان ۇلتتىق قۇراماسىنىڭ باس باپكەرى، سلوۆەنيالىق مامان سرەچكو كاتانەتس دەنساۋلىعىنا بايلانىستى وتستاۆكاعا كەتتى. بۇل تۋرالى وزبەكستان فۋتبول قاۋىمداستىعى (وفق) Telegram-ارناسىندا جازدى، دەپ حابارلايدى "ادىرنا" ۇلتتىق پورتالى.
كاتانەتس ەكى جاقتى كەلىسىمدى توقتاتۋ تۋرالى شەشىمدى ءوزى قابىلداعان.
«ءوز ۇندەۋىندە سلوۆەنيالىق باپكەر قازىرگى جاعدايدا ءوز مىندەتتەرىن تولىققاندى جانە كاسىبي تۇردە اتقارا المايتىنىن وكىنىشپەن ايتتى. ول قاۋىمداستىققا تۇراقتى قولداۋى مەن جەمىستى ىنتىماقتاستىعى ءۇشىن العىسىن ءبىلدىردى»، – دەلىنگەن حابارلامادا.
بۇعان دەيىن كاتانەتس بىرنەشە رەت ۇلتتىق قۇرامانىڭ رەسمي ماتچتارى مەن جاتتىعۋ جيىندارىنا كەلمەگەن ەدى. وتكەن جىلى دەنساۋلىعىنا بايلانىستى تاعى ءبىر جيىنعا قاتىسا الماعاننان كەيىن، ءباسپاسوز كونفەرەنتسياسىندا ول ءوزىن ناشار سەزىنگەن جاعدايدا وتستاۆكاعا كەتۋگە دايىن ەكەنىن مالىمدەگەن ەدى. ەكى كۇن بۇرىن كاتانەتستىڭ وزبەكستان قۇراماسىنىڭ كاتارداعى كەزەكتى جيىنىنا كەلمەگەنى بەلگىلى بولدى. باق-تا باپكەردىڭ ونكولوگيالىق اۋرۋمەن كۇرەسىپ جاتقانى تۋرالى اقپارات تارادى.
ايتا كەتۋ كەرەك، كاتانەتس وزبەكستان قۇراماسىنىڭ تاريحىنداعى ەڭ تابىستى باپكەر سانالادى. ونىڭ جەتەكشىلىگىمەن قۇرام 21 رەسمي ماتچ وتكىزىپ، تەك ەكى رەت جەڭىلىس تاپقان. سونداي-اق، الەم چەمپيوناتىنا جولداما الۋ مۇمكىندىگىنە بارىنشا جاقىنداعان ەدى.
وزبەكستان قۇراماسىنىڭ جاڭا باس باپكەرىنىڭ ەسىمى جاقىن ارادا بەلگىلى بولادى. سونداي-اق، 22 اقپاندا وزبەكستان فۋتبول قاۋىمداستىعىنىڭ كەزەكتەن تىس سەزى وتەدى. بۇل جيىندا ۇيىمنىڭ جاڭا پرەزيدەنتى سايلانباق. بۇرىن بۇل قىزمەتتى مەملەكەتتىك قاۋىپسىزدىك قىزمەتىنىڭ (مقق) ەكس-باسشىسى ابدۋسالوم ازيزوۆ اتقارعان.
