پرەزيدەنتتىڭ حالىقارالىق ەكولوگيالىق ىنتىماقتاستىق جونىندەگى ارناۋلى وكىلى ءزۇلفيا سۇلەيمەنوۆانىڭ قازاقستان مەن جاپونيا مەملەكەتتىك جانە جەكە سەكتورلارىنىڭ بىرلەسكەن كوميسسياسىنىڭ 8-ءشى وتىرىسى اياسىندا جاپونياعا بارعان ساپارى اياقتالدى. بۇل تۋرالى الەۋمەتتىك جەلىدەگى پاراقشاسىنا جازدى، دەپ حابارلايدى “ادىرنا” ۇلتتىق پورتالى.
ساپار بارىسىندا ول مەملەكەتتىك سىرتقى ىستەر ءمينيسترى كيەتو تسۋدجيمەن جانە قورشاعان ورتانى قورعاۋ ۆيتسە-ءمينيسترى يۋتاكا ماتتسۋزاۆامەن كەزدەستى.
“جيىندا ىنتىماقتاستىقتى تەرەڭدەتۋ ماسەلەلەرى، ونىڭ ىشىندە جاسىل جانە كليماتتىق تەحنولوگيالار سالاسىنداعى ماسەلەلەر، دەكاربونيزاتسيا، سونداي-اق، «ورتالىق ازيا - جاپونيا» ديالوگى اياسىنداعى ىنتىماقتاستىقتى نىعايتۋ تالقىلاندى. سەرىكتەستەر مەملەكەت باسشىسىنىڭ بۇۇ قامقورلىعىمەن 2026 جىلى استانادا وڭىرلىك كليماتتىق سامميت وتكىزۋ تۋرالى باستاماسىن جوعارى باعالاپ، ونىڭ ماڭىزدىلىعىن اتاپ ءوتتى”، دەپ جازدى ءزۇلفيا سۋلەيمەنوۆا.
سونداي-اق، حالىقارالىق ەكولوگيالىق ىنتىماقتاستىق ورتالىعىنىڭ (OECC) پرەزيدەنتى كادزۋ تاكەموتومەن دە كەزدەسۋ وتكىزدى.
“جاپونيانىڭ بىرلەسكەن نەسيەلىك مەحانيزمى (JCM) شەڭبەرىندە دەكاربونيزاتسيا جوبالارىن ىسكە اسىرۋ پەرسپەكتيۆالارى تالقىلاندى. OECC JCM شەڭبەرىندە جوبالاردى ازىرلەيتىن جانە ۆەريفيكاتسيالايتىن نەگىزگى ۇيىم بولىپ تابىلادى. سونداي-اق كليماتتىق جانە ەكولوگيالىق تەحنولوگيالاردىڭ ترانسفەرتى مۇمكىندىكتەرى تالقىلاندى”، دەدى پرەزيدەنت كەڭەسشىسى.
جاپونيا حالىقارالىق ىنتىماقتاستىق بانك (JBIC) باسقارۋشى اتقارۋشى ديرەكتورى تاتسۋشي امانومەن كەزدەسۋ وتكىزىلگەنى ايتىلدى. كەزدەسۋ بارىسياندا ىنتىماقتاستىقتى دامىتۋ جانە بانكتىڭ قازاقستانداعى قىزمەتىن كەڭەيتۋ پەرسپەكتيۆالارى تالقىلانعان.
“بانك جۇزەگە اسىرىپ جاتقان ەكونوميكالىق ءوسۋ مەن تابيعاتتى ساقتاۋدى بىرىكتىرۋ جونىندەگى جاھاندىق ارەكەتى (GREEN) جانە جاھاندىق ينۆەستيتسيالاردى كەڭەيتۋ مەحانيزمى تالقىلاندى. وسى باعىتتاعى ديالوگتى جالعاستىرۋ كەلىسىلدى.
پارلامەنتتىڭ سىرتقى ىستەر ۆيتسە-ءمينيسترى ەيچي فۋكازاۆامەن دە اڭگىمە جۇرگىزىلدى. ساپار اياسىندا، جاپونيانىڭ ۇلتتىق ساياسي زەرتتەۋلەر ينستيتۋتىنىڭ پرەزيدەنتى حيروكو وتامەن جانە اتقارۋشى ۆيتسە-پرەزيدەنت ماساكو كۋروساۆامەن كەزدەسۋ وتكىزىلدى”، دەپ ءسوزىن قورىتىندىلادى.
