اۋزىن تىگىپ تاستاعان مارافونشى، ازاماتتىق بەلسەندى، "العا، قازاقستان!" ساياسي پارتياسىن قۇرۋشى باستاماشىل توپتىڭ جەتەكشىسى مارات جىلانباەۆ تىگىسىن العانى حابارلاندى. بۇل تۋرالى قازتاگ جاريالادى، دەپ حابارلايدى “ادىرنا” ۇلتتىق پورتالى.
«1 قاراشادا سوتتالۋشى م.ت.جىلانباەۆ اۋزىن جىپپەن تىگىپ، تاماقتان باس تارتۋ تۋرالى ارىز بەرگەن. ول ءوز ارەكەتىن استانا قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ 2 قاراشاعا بەلگىلەنگەن جابىق سوت وتىرىسىن وتكىزۋىمەن كەلىسپەيتىندىگىمەن تۇسىندىرەدى»، - دەپ حابارلادى بەيسەنبى كۇنى دەپارتامەنتتىڭ ءباسپاسوز قىزمەتى.
ۆەدومستۆودا اتاپ وتكەندەي، جىلانباەۆتىڭ «مەكەمە اكىمشىلىگىنىڭ قىزمەتكەرلەرىنە شاعىمى جوق».
«سول كۇنى مەكەمە باسشىلىعىمەن پروفيلاكتيكالىق اڭگىمە جۇرگىزىلگەننەن كەيىن سوتتالۋشى م.ت.جىلانباەۆ تىگىسىن الىپ تاستادى. مەديتسينالىق كۋالاندىرۋ كەزىندە جىلانباەۆ ماراتتىڭ دەنساۋلىعىنا شاعىمى جوق، جالپى جاعدايى قاناعاتتانارلىق. ول قوسىمشا تەكسەرۋلەردەن جانە مەديتسينالىق مامانداردىڭ كەڭەسىنەن باس تارتتى»، - دەپ تولىقتىردى ۆەدومستۆودان.
ەسكە سالايىق، جىلانباەۆقا"ەكسترەميستىك ۇيىمنىڭ جۇمىسىنا قاتىستى، ونى قارجىلاندىردى" دەيتىن ايىپ تاعىلدى.
