ءمۇفتيات «Zam-Zam Qazaqstan» تۋريستىك كومپانياسىنىڭ باسشىسى دانيار يليەۆتىڭ ۇستىنەن سوتقا شاعىم تۇسىرمەك. بۇل تۋرالى قازاقستان مۇسىلماندار ءدىني باسقارماسىنىڭ (قمدب) ورتالىق اپپاراتى جاريالادى, دەپ حابارلايدى “ادىرنا” ۇلتتىق پورتالى.
ايتۋلارىنشا، دانيار يليەۆ مۇفتياتقا جالا جاپقان.
«Zam-Zam Qazaqstan» (زاڭدى اتاۋى – «Zam Zam store») كومپانياسىنىڭ جالعان قۇجات راسىمدەپ، قاجىلاردى زاڭسىز جولمەن ساۋد ارابياسىنا اپارىپ، جەرلەستەرىمىزگە ءجابىر كورسەتكەن ارەكەتى قوعامنىڭ نازارىن اۋداردى.
الايدا «Zam-Zam Qazaqstan» كومپانياسىنىڭ جەتەكشىسى دانيار يليەۆ ءوزىنىڭ شاريعاتقا جانە زاڭعا قايشى ارەكەتىن مويىنداماي، مۇفتياتقا جالا جابۋمەن شەكتەلۋدە، دەپ جازدى قمدب ورتالىق اپپاراتى.
ايتا كەتەيىك، دانيار يليەۆ «31 ارنا» تەلەارناسىنىڭ «50/50» الەۋمەتتىك توك-شوۋىنىڭ 2023 جىلعى 29 ماۋسىم كۇنگى ەفيرىنە بەرگەن سۇحبات بەرگەن بولاتىن. قمدب ورتالىق اپپاراتى ونىڭ ءسوزى ەشقانداي دالەلسىز، ءسوز جاۋاپكەرشىلىگىن سەزىنبەي «ءمۇفتيات تۋرفيرمالاردان ءار قاجى ءۇشىن 500 دوللار پارا الادى» دەگەن مازمۇندا اۋىر جالا جاپقانىن ايتتى.
ءمۇفتيات بۇل اقپاراتتىڭ جالعان ەكەندىگىن جانە قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى قازاقستان رەسپۋبليكاسىنىڭ 2014 جىلعى 5 شىلدەدەگى № 235-V قرز كودەكسىنىڭ 73-3 (جالا جابۋ، ياعني باسقا ادامنىڭ ابىرويى مەن قادiر-قاسيەتiنە نۇقسان كەلتiرەتiن نەمەسە ونىڭ بەدەلiن تۇسiرەتiن كورiنەۋ جالعان مالiمەتتەر تاراتۋ، كوپشiلiك الدىندا نەمەسە بۇقارالىق اقپارات قۇرالدارىن نەمەسە تەلەكوممۋنيكاتسيالار جەلىلەرىن پايدالانا وتىرىپ جاسالعان ءدال سول ءىس-ارەكەت) «جالا جابۋ» بابىنا سايكەس د.يليەۆتىڭ ۇستىنەن سوتقا شاعىم تۇسىرەتىنىن حابارلايدى.
سونىمەن قاتار قۇقىق قورعاۋ ورگاندارى قاجىلاردى وسىعان دەيىن الداپ، دالادا قالدىرعان اتالعان كومپانيانىڭ زاڭسىز ارەكەتتەرىنە تەز ارادا نازار اۋدارىپ، زاڭ بۇزۋشىلاردى قۇقىقتىق جاۋاپكەرشىلىككە تارتۋ بويىنشا ءتيىستى شارالار قولدانادى دەپ سەنەمىز.
قازاقستان ازاماتتارىن الداعى جىلدارى وسى سەكىلدى الاياقتاردىڭ تۇزاعىنا ءتۇسىپ قالماس ءۇشىن، قاجىلىق كونكۋرسىنان وتكەن، ياعني قاجىلىق ساپارىن ۇيىمداستىرۋعا قابىلەتتى دەپ تانىلعان، ءمۇفتيات جاريالاعان تىزىمگە ساي تۋروپەراتورلار قىزمەتىنە جۇگىنۋ قاجەتتىگىن تاعى دا قاپەرگە سالامىز، دەپ جازدى.
